'Xilaba 2012. Bertsulari Txapelketa' zuzenean, larunbatean

Larunbatean Iparraldeko Bertsolari Txapelketako finala, 'Xilaba 2012. Bertsulari Txapelketa', zuzenean emango du eitb.com-ek eta ETB-1ek. Sarean 17:30ean eskainiko dute eta ETB-1en, futbolaren ondoren, 19:00etatik aurrera egingo dute bat finalarekin. Jon Artanok egingo ditu esatari lanak, Mixel Aire Xalbador II adituarekin batera.

Baionan jokatuko den finalean Odei Barrosok, Sustrai Colinak, Amets Arzallusek, Eneritz Zabaletak, Xumai Muruak eta Maddi Sarasuak hartuko dute parte.

'Hitzetik Hortzera' azaroan

Bestalde, 'Hitzetik Hortzera' bertsolaritzari eskainitako tartea ETBn azaroaren 23an jarriko da abian Jon Artanok aurkeztuta. Denboraldi honetan ostiral gauetan emango da 'Hitzetik Hortzera' eta bigarren emanaldia, berriz, igande bazkalostean. Platotik irtengo dira kurtso honetan eta protagonistak bere saltsan harrapatu eta elkarrizketatuko dituzte. Jaialdi, lehiaketa eta bertso afari guztietan egongo da 'Hitzetik Hortzera'. Bertso mundua jorratuko dute astero-astero.