albistea
Aurrerapena
Mesfidantzek hainbat harreman kolokan jarriko dute, 'Goenkale'n
'Goenkale' telesailaren asteleheneko atalean (22:00etan, ETB-1en), une garratzak helduko zaizkio Arraldeko hainbat biztanleri.
Informazio gehiago (2)
'Goenkale' telesailaren asteleheneko atalean (22:00etan, ETB-1en), mesfidati ibiliko da zenbait arraldetar, eta horrek kolokan jarriko ditu harreman batzuk.
Hasteko, Estepan Garbiñeren bizitzan berriz agertzeak, familiako giroa hankaz gora jartzeaz gain, Sabinoren eta Garbiñeren arteko harremanean eragina izango du. Izan ere, Sabinok bere neska-lagunaren eta beste gizon baten arteko besarkada ikusiko du, eta, erabat minduta, zer egin ez dakiela geldituko da.
Bestalde, Telmok agur esango du. Mutilak Aliziari eskertu egin nahiko dio beregatik egindako guztia, eta azken horrek tentazioa hurbil izango du berriz ere.
Saidek ustekabeko bisita izango du. Bisita horrek une onak ekarriko dizkio, baina baita buruhausteren bat ere. Dena den, Eiderrengana gehiago hurbilduko da horren guztiaren ondorioz.
Lukasentzat ez da une gozoa izango. Malenek bere garaian kontratatutako detektibeak argazki batzuk argitara atera nahi ditu, eta Lukas ikaratuta dabil, argazki horiek arriskuan jar baitezakete Ikernerekin daukan harremana.
Azkenik, Aliziak gero eta mesfidantza handiagoa dauka Jonekin, eta horrek eragina izango du azken horren eta Germanen arteko adiskidetasunean.
