"Berdin zait jendeak niregatik zer pentsatzen duen. Hitz egin dezatela. Horrek bizirik nagoela esan nahi du."

Kirola oso garrantzitsua da azkoitiar gazte honentzat. Astean 7 edo 8 entrenamendu egiten ditu; gimnasia erritmikoa, gutxienez, hiru alditan eta fitness beste lau alditan. Bere iritzian, ezingo luke zoriontsu izan fitnessik gabe: "begiak ireki dizkit".

Lehiaketan %100 emango duenaren uste osoa dauka Ainhizek. "Amore eman baino lehenago mareatu" egingo omen da. Gainera, lidergoa hartzen duen horietako da izaeraz. Ez da kikiltzen eta aurpegia emateko arazorik ez du izaten. Hori bai, estrategia garbiak nahiago ditu: joko zikina eta jende faltsua ez ditu batere gustuko.

Bere mutila, Iñigo Lasa, ere "Baserria"n lehiakide izango dugu edizio honetan. Biak kaletarrak izanda, ez dituzte bikote gisa jarriko; baina, hala balitz, ekipo ona egingo luketela uste du. Saio honetan parte hartuta, harremana indartu egingo dela uste du Ainhizek. Hala ere, argi dauka Negutegian beste inori baino errazago esango dizkiola Iñigori esan beharrekoak, "konfiantza dagoelako".