"Beldurra diot kamera aurrean itsusi irteteari"

Geldirik egoten ez den eta alaitasuna transmititzen duen neska da Naiara.

Egunero egiten du kirola eta bere buruari erronkak jartzea gustatzen zaio. Crossfit, indar-ariketak, dantza, kickboxing, yoga, halterofilia, mendira joan … Disziplina asko probatu ditu.

Horrez gainera, nortasun handiko emakumea da. Itxura deigarria du, baina ez dio axola jendeak horri buruz zer pentsatzen duen. Duela urte batzuk, 'Naiara always happy' izeneko kanala zabaldu zuen Youtuben. Arropari, makillajeari eta orrazkera ezberdinei buruz hitz egiten du, aholkuak ematen ditu … Ez litzaioke gustatuko kameraren aurrean bere burua itsusi ikusterik. Entrenatzera ere makillatuta joaten dela aitortzen du.

Bestetik, oso pertsona emozionala dela dio. Negar asko egiten duela dio baina, normalean, poztasunak eragindako malkoak izaten dira.

Eroso sentitzen da zerbaitetan ona den jendearekin. Haien ondoan ikasi egiten du eta hazi egiten dela sentitzen du.

Azkenik, ingurugiroarekin oso konprometituta dago, ez du okelarik jaten eta ezin ditu jasan animaliak gaizki tratatzen dituzten pertsonak.