Itxi

Bostekoa

Bostekoa

Bostekoa

22:30ean

Gaur hasiko da 'Bostekoa', herri kirol lehiaketa ardatz duen saioa

EiTB

Aitor Zubieta pilotari ohiak aurkeztuko du, eta astero, bi herritako taldeek neurtuko dituzte indarrak. Lehen atalean, Tolosa eta Ibarra izango dira aurrez aurre.

0:28
Ibarra eta Tolosa, sokatiran lehiatzen

Gaur gauean, 'Bostekoa' saio berria estreinatuko du ETB1ek ordutegi nagusian. Aitor Zubieta Etxarri Aranazko pilotari ohiaren eskutik, 'Bostekoa' programak herri kirolak izango ditu ardatz. Zortzi herrik hartuko dute parte, herri bakoitza bost lehiakideko talde batek ordezkatuko du eta bost kiroletan neurtuko dituzte indarrak.

Programak bi zati izango ditu. Lehenengo zatian, Aitor Zubietak egun batzuk igaroko ditu lehiatuko diren bi herrietan. Lehiakideak eta horiek herri kirolekin dituzten harremanak ezagutuko ditu. Gainera, euren inguruko jendearekin solasean arituko da, eta herriko jendea eta txokoak ezagutuko ditu. Oro har, herriak eta lehiakideak ikus-entzuleengana gerturatzea, lehiaren aurreko giroa berotzea eta ikusmina piztea izango dira helburu nagusiak.

Saioaren bigarren zatia, berriz, lehiaketa bera izango da. Lehiakideek, esan bezala, bost probatan neurtuko dituzte indarrak. Batetik, sokatiran ariko dira; bi tiraldi egingo dituzte, eta hirugarren bat, berdinketa badago. Harria jasoko dute gero; 63 kiloko harria hamar aldiz altxatu beharko dute. Ondoren, txingen txanda izango da; 25 kiloko txingak hartuta, hiru joan-etorri egin beharko dituzte (sei plaza, guztira; plaza bakoitzak 21 metro ditu). Hori amaitutakoan, trontzan jardungo dute; bost mozketa egin beharko dizkiote 45 ontzako perimetroa daukan pinuaren enborrari, eta euskal zerra erabiliko dute horretarako. Azkenik, giza proba egingo dute; 470 kiloko bi harri erabiliko dituzte, eta talde bakoitzak bi plaza egin beharko ditu bakoitzarekin. Denbora izango da probak irabazi edo galtzeko gakoa, proba guztiak burutzeko denbora gutxien behar duen taldeak egingo baitu aurrera.

Herri kirolak ikusaraztea eta ikus-entzuleei hurbiltzea da saioaren asmoa, eta, hein berean, emozioz betetako programa entretenigarria eskaini nahi du ETBk. Taldekideen artean, berriz, denetariko profilak ikusiko ditugu, herrien arabera.

Herriko irratia saioaren haria

Bestalde, programaren haria irratia izango da. Hau da, herri bakoitzean, tokian tokiko irratiak lagunduko du Zubietaren eta lehiakideen esperientzia kontatzen, bai programan zehar, baita lehiaketan bertan ere.

Bi herrien arteko lehiaketa Birleko probalekuan jokatuko da, Mungian. Lehenengo final-laurdenetako neurketetan, hauek ikusiko ditugu nor baino nor gehiago: Ibarra-Tolosa, Elorrio-Abadiño, Leitza-Goizueta eta Azpeitia-Errezil. Elkarren artean, jokoan hasi aurretik, mokoka izaten diren herriak jarri dituzte aurrez aurre. Herri horietako lauk finalerdiak jokatuko dituzte, eta, azkenik, final handia jokatuko da.

Talde irabazleak 5.000 euro jasoko ditu, eta, horrez gain, Herrien Arteko Pentatloi Txapelketako txapela jantziko du.

Tolosa eta Ibarra, aurrez aurre

Emozioak ez du hutsik egingo herri kirolei buruzko 'Bostekoa' programaren lehen atalean. Tolosa eta Ibarra herriak izango dira eguneko protagonista, tradizio eta lehia handiko bi herri. Bata bestetik gertu izan arren, bien arteko aldeak agerian geratuko dira saioan. Herri eta talde bakoitzak berea ekarriko du: une hunkigarri bezain lehiakorrak, laguntasunari zein familiari lotutakoak, barre zein negar egitea eragingo dutenak. Biek ala biek izango dute zer erakutsi eta zer adierazi, eta horren erantzule izango dira talde bakoitzeko parte-hartzaileak. Beraien indarrak eta abileziak erakusteko iritsiko dira.

Tolosako taldean hauek arituko dira: Alatzne Etxaburua (sokatiran eta trontzan), Iñaki Errazkin (sokatiran, harria jasotzen eta giza proban), Myriam Elorza (sokatiran eta txingetan), Igor Otero (sokatiran eta trontzan) eta Daniel Ariztimuño (sokatiran eta giza proban).

Ibarra ordezkatuz, berriz, Oihane Sarasola (sokatiran eta trontzan), Aritz Garmendia (sokatiran eta giza proban), Aitor Luluaga (sokatiran, trontzan eta giza proban), Iñaki Agirre (sokatiran eta harria jasotzen) eta Ixiar Irastorza (sokatiran eta txingetan) gogor aritzeko prest eta herriaren alde egitera aterako dira.

  • Bisitatuena

      Kargatzen ikusiena
      Kargatzen ikusiena