Brouarden eta Muguruzaren hilketei buruz, 'Debatea' saioan

Gaur gauean, Azaroak 20, zorigaitzeko eguna erreportajearen ondoren, Santi Brouarden eta Josu Muguruzaren hilketak izango dira 'Debatea' saioak abiaraziko duen eztabaidaren hari nagusiak, haiek oroituz orainaldira jauzi egiteko. Izan ere, justiziaren aurpegi anitzak agertuko dituzte, eta biktimen izaera desberdinak aztertu, erakundeek biktima horiekin izandako jokaerari neurria hartzeko helburuarekin.

Gaiaz hitz egiteko, Xabier Usabiagak honako gonbidatuak izango ditu: Jose Felix Azurmendi kazetaria, Andoni Unzalu informatikaria, Luis Haranburu Altuna idazlea, Xabier Oleaga kazetaria, Jose Ramon Beloki EAJko diputatu ohia, Iker Uson Baketik-eko kidea eta Mikel Zubimendi kazetari eta Josu Muguruza. Balek hondatu ez zuten ametsa liburuaren egilea.

Azaroaren 20a egutegian odolarekin idazten den data da. 2014ko azaroaren 20 honetan 30 urte bete dira GALek Santi Brouard pediatra eta Herri Batasuneko kidea hil zuela eta 25 urte igaro dira Josu Muguruza HBko diputatua bi pistoladunek Madrilen erail zutenetik Kongresurako akta bere egin behar zuen egunaren bezperan.

Gainera, beste bi gertari gehiagok are odoltsuagoa egiten dute azaroak 20 dituenekoa. Batetik, Franco diktadorea halako egunarekin hil zelako bere etxeko ohean, 1975. urtean, eta Jose Antonio Primo de Rivera ere egun berdinean zendu zelako, 1936. urtean.

Oroimen historikoa, gainera, azken egunotan albiste izan da. Hor da Interpolek emandako agindua hainbat ministro frankista atxilotzeko eta Servini epaile argentinarraren aurrera eramateko. Nafarroan ere eztabaida piztu da Yolanda Barcinaren gobernuak Urrezko Domina Erregimenarekin lotura zuzena izan zuten Huarteri eta Urmenetari emango dielako.

Halaber, eskuin muturreko mugimenduek egun zer-nolako indarra duten eta politikaren zelaian bere agertokiaz zein den hausnartu nahi du egunerokotasunari zuzen begiratu nahi dion 'Debatea' saioak.