Artea, zientzia eta teknologia, 'EiTB Kultura-Transit' saioan

Technarte jardunaldiez ariko dira gaur gauean 'EiTB Kultura' saioan. Nano-artea, bio-artea, mobile-artea eta arkitektura interaktiboa dira arte, zientzia eta teknologia batuta sortzen diren arte joera ugarietako batzuk. Teknologia, gainera, gero eta tarte zabalagoa hartzen ari da, Bilbon amaitu berri diren Technarte jardunaldietan ondo baino hobeto ikusi denez.

Aurten, big data deritzonak izan dira protagonista. Saioan, Pau Garcia eta Axel Gasulla artistak elkarrizketatuko dituzte, eta baita Marco Ferrari arkitektoa ere, datu ezberdinak oinarrian dituzten instalazio interaktiboak egin baitituzte. Halaber, Eduardo Miranda konpositore bio-konputazionala eta Sougwen Chung disziplina desberdinak jorratzen dituen artista ere izango dituzte.

'EiTB Kultura' gaur gauean izango da ikusgai, 00:00etan ETB1en eta 01:30ean ETB2n.