Go!azen
CASTING-AREN INFORMAZIOA
'Go!azen' telesailak hiru aktore berri behar ditu hurrengo denboraldirako
A.A. | EiTB
Hautagaiek bideo bat igo behar dute webera bere burua aurkeztuz, eta abesten edo dantzatzen dakitela erakutsiz. Bideoa igotzeko azken eguna gaur, igandea izango da.
Bideoak (1)
Informazio gehiago (1)
Euskal Telebista eta Pausoka ekoiztetxeak elkarrekin ekoizten duten 'Go!azen' telesailak hiru aktore berri behar ditu hurrengo denboraldirako. Udan grabatuko den 7.0 denboraldian parte hartuko dute hiru aktore berri horiek, aurreko urteetako gazteekin batera. Bilaketa lanari ekiteko, casting prozesua zabaldu da.
Aktore lanetan aritu nahi duten 16 eta 22 urte arteko gazteei zuzendutako castinga izango da hau eta, prozesuan zehar, interpretatzeko, abesteko eta dantzatzeko dituzten gaitasunak erakutsi beharko dituzte.
Prozesu horretako lehen fasea internet bidezko casting-a da. Aktore izan nahi duten hautagaiek telesailaren webgunearen bidez, euren bideoa igorri beharko dute. Telesailak eitb.eus-en duen Castinga atalean (eitb.eus/goazencasting) duzue prozesu horri buruzko informazio osoa (baldintzak eta lege oharrak barne) eta bideoak eta datuak bidaltzeko formulario bat jarri da.
Nola igo zure bideoa?
Lehendabizi formulario hori bete, lege oharra onartu eta gorde botoiari eman. Ondoren, jarri duzun helbide elektronikora mezu bat iritsiko zaizu; bertan dagoen esteka klikatu eta beste formulario batera eramango zaitu. Orduantxe igo ahal izango duzu bideoa. Bideo bat edo gehiago igo ditzakezu esteka klikatuta zabalduko zaizun orri horretan, baina banaka igo beharko dituzu: bat igo eta "edukia ondo igo da" dioen mezua atera arte itxaron, ondoren bigarrena aukeratu eta hori igo, eta abar...
Bideoak edozein formatutan bidal daitezke eta ez dago iraupen mugarik. Hori bai, kontuan izan artxiboaren iraupenak, pisuak eta interneteko konexioak eragina izango dutela bideoaren igoera prozesuan. Horrez gainera, horizontalean grabatuta egotea eskatzen da. Arazoak baldin badituzu, gurekin harremanetan jar zintezke goazenkastina@eitb.eus helbidean.
Hautagai bakoitzak bideo bat edo gehiago igo ditzake, eusk"araz aktore lanak egiteko daukan gaitasuna erakusteko. Honakoa egiteko eskatzen da: norbere burua euskaraz aurkeztu, "Go!azen"-eko sekuentzia gustukuenaren interpretazio txiki bat egin, abestu eta dantzatzea.
Bideoak jasotzeko epea gaur, maiatzak 24, amaituko da.
Internet bidez parte hartuko dutenetatik behar diren pertsonaietarako profil egokiena izan dezaketenei deituko zaie casting prozesuaren hurrengo faseetan parte hartu dezaten. Hainbat interpretazio froga egingo dira prozesu horretan, online moduan edota aurrez aurre, harik eta aktore definitiboak aukeratu arte.
