Goenkale
Aurrerapena
Ertzain-etxetik ihes egingo du Mitxelek, gaur, 'Goenkale'n
Gaurko atalean, Mitxel atxilotu egingo dute bere sekretua agerian gelditu ostean. Gainera, Itxasok desengainua hartuko du Aitorrekin. Bestalde, Asun iruzur baten biktima izango da.
'Goenkale' telesailaren aurtengo denboraldia amaierara iristen ari da. Gaur gaueko atalean, bere onetik aterata Aliziarekin bakarrik egotea lortuko du Mitxelek, baina Kandido eta Nekane azalduko dira. Dena den, inork ez ditu ezagutuko Mitxelen benetako asmoak. Oso ondo ezagutzen du polizia-etxean atxilotuekin ematen diren pausoak, eta oso erraz lortuko du denak engainatu eta ihes egitea, baina ez denbora luzez.
Txarrena pasatuta, Aliziak beste dilema bat du oraingoan. Berarekin ezkondu zen gizona psikopata zela kontatu beharko dio bere alaba Naiari, baina ez daki nola egin. Kandidok esaten dion moduan, Naia ez da engainatuta sentitu behar.
Itxasok ere etsipen sentimendua du. Batera igaro zuten azken gaua elkarrekin egon ahal izateko, gezurra esan ziola aitortu dio Aitorrek. Hori jakinda, Itxaso oso haserre agertuko da ertzain berriarekin, eta berarekin maiteminduta ez dagoela esango dio. Hala ere, Aitorrek badaki hau ez dala egia eta musukatzen saiatuko da.
Asun ere engainu baten biktima izango da. Iruzurti batek, sinadura baten truke, opari moduan, liburu batzuk eskainiko dizkio. Baina geroago jakingo duen moduan, sinadura horren bidez 4.000 euroko balioa duten objektuak jasoko ditu. Honetaz ohartzen denean, iruzurgilearekin hitzordua jarriko du Itxasok "erosketa" bat egiteko.
Gaur, 22:25ean, 'Goenkale'ren atal berri bat izango da ikusgai ETB1en eta eitb.com-en.
