Goenkale
22:15ean
Hesian taldea, gaur gauean, 'Goenkale'n
I.A.
Hegalak astinduz disko berriaren abesti bat joko du taldeak. Kontzertua Tolosako Bonberenea aretoan grabatu zuten.
Bideoak (1)
Galeriak (1)
Informazio gehiago (1)
Gaur eskainiko duten "Goenkale"ren atalean agertuko da Hesian taldea. Hegalak Astinduz aurki kaleratuko duten disko berriaren kantu bat abestuko dute Sakanakoek. Tolosako Bonberenea aretoan grabatu zuten kontzertua.
Gaurko atalean, Asun, Lupe eta Sabinoren arteko elkarbizitza korapilatzen joango da, eta egoerak eztanda egingo du. Hirurek gauzak argi uztea erabakiko dute.
Kandidok Barbara ikertzen jarraituko du, eta Patricia Hidalgoren identitateaz gain, Barbarak iruzur batzuetan erabilitako beste izen batzuk aurkituko ditu. Berez konfidentziala den informazio hau beste norbaiten belarrietara helduko da.
Naiak Afrikan zuen bizitzaren inguruko sekretua zein den jakingo du Aliziak, eta Arralden berarekin gelditzeko erabakia kolokan jarriko du horrek. Afrikara joateko eguna heldu da, baina, joango ote da Naia? Edo Arralden gelditzea erabakiko du azkenean?
Hodeiri zorabioak emango dio, eta azterketa medikoak egitera joango da; umetan talasemia izeneko gaixotasuna izan zuela esango diote. Hala ere, gurasoei ezer esan gabe jarraituko du aurrera.
Bestalde, "Goenkale"ko gazteen amodio kontuen berri izango dugu, Hesian taldearen musikaz gozatzen dugun bitartean. Alaznek Hesianen kontzertura joan nahiko du, Endika, gustuko duen mutila, bertan izango baita. Amak baimena emango dio Taniari esker, eta ahizpa berarekin joango da. Hodei eta Paola ere bertan izango dira. Halere, Endikari gehiago interesatuko zaio Tania Alazne baino; telefono-zenbakia eskatuko dio Taniari, eta Alazne haserretu egingo da.
Grabazio irekia
Grabaziora nahi zuen edonor joan zitekeen. Horrela, Sakanako taldea gertutik jarraitzeaz gainera, telesail bat grabatzeko lana nolakoa den ikusi eta 'Goenkale' saioan estra bezala agertzeko aukera izan zuten bertaratu zirenek.
Zuriñe Hidalgo, "A Ze Banda!" saioan epaimahaikide
Hesian taldeko abeslariak ETB1eko "A Ze Banda!" musika lehiaketa berrian parte hartuko du asteazkenetik (urriak 15) aurrera. Alex Sardui Gatibuko abeslariarekin batera, epaimahaia osatuko du Zuriñe Hidalgok.
Ez galdu "Goenkale", astelehen eta astearteetan, 22:15etik aurrera, ETB1en eta eitb.eus-en zuzenean.
