Unaxen azpikeriak agerian geldituko dira, gaur, 'Goenkale'n

Unaxen benetako nortasuna argi geldituko da 'Goenkale'ren azken-aurreko atalean. Horrekin batera, Hodeik Tania maite duela aitortuko die etxekoei, eta Axunek Boga taberna salbatzeko saiakera desesperatua egingo du.

Unaxen azpikeriak eta jokaerak agerian gelditzeko puntuan daude. Hodeik eta Endikak estrategia bat landuko dute zaldiaren heriotzaren errua Unaxena dela argi uzteko. Lortuko ote dute frogak bilatzea? Eta, horrekin batera, Nekanek Etxegaraitarren farmazian egindako lapurretaren erantzuleak nortzuk diren jakingo du.

Bestalde, ausardiaz beteta dagoela aprobetxatuz, eta Gazteako lehiaketa irabazi zutenean Taniari muxua eman ondoren, aurrera egitea erabakiko du. Lehendabizi, Paolarekin hautsiko du, eta, ondoren, Tania maite duela aitortuko die etxekoei. Baina Taniak ez zuen aitortza hori egingo zuenik espero. Ondo irudituko al zaio?

Boga salbatuko ote?

Boga taberna botatzeko planarekin aurrera jarraitzen dute Arraldeko agintariek. Egutegi erotikoak arrakasta izan du, baina bildutako dirua ez da nahikoa konponketak egiteko, eta ematen du ez dagoela beste konponbiderik. Hori horrela, Axunek azken saiakera egitea erabakiko du, saiakera desesperatua eta legea urratzen duena. Zer emaitza emango du?

Bogarena kolokan dagoen bitartean, Sabinen kartzela barruko egoera konpontzea lortu du Axunek. Kandidoren laguntzari esker, Sabin pakean utzi dute, eta zoriontasuna itzuli da.

'Goenkale'ren azken-aurreko atala gaur izango da ikusgai, 22:25ean, eitb.eus-en eta ETB1en.