Gu Ta Gutarrak
21:00etan
'Gu ta Gutarrak' saioaren final handia, gaur gauean, ETB1en
EITB
Gutarrek eta saioko lankideek Debako Kulunka dantza-taldearen laguntzaz prestatutako flashmobak emango dio hasiera hirugarren edizioko finalari.
Galeriak (1)
Informazio gehiago (1)
'Gu ta Gutarrak' saioak ikuskizun handia prestatu du gaur gauerako, Euskal Herriko hirugarren kuadrilla jatorrena nork osatuko duen ezagutzeko. Sorpresaz beteriko gaua izango da gutarrentzat; euren senitarteko eta lagunen animoak ez ezik, euren herrien bultzada ere jasoko dute. Aspaldiko lagunen bisita eta miresten dituzten pertsonaia ezagunen mezuak jasoko dituzte finalean lehian izango diren gutarrek. Musika ere izango da zuzenean, Euskal Herriko talde handienetako batek dantzan jarriko baitu 'GTG'eko platoa.
Hamar lagun iritsi dira hirugarren edizioko Gutarren Final Nagusira, baina sei gutarrek soilik osatuko dute kuadrilla jatorrena. Gutarrek beraiek emandako botoek eta gutarzaleek www.eitb.eus atarian emandako botoek erabakiko dute kuadrilla jatorrena nork osatuko duen. Publikoak internet bidez emandako boto beltzak ere berebiziko eragina izango du kuadrilla osatzeko garaian. Osagai horiekin guztiekin, orain arte izan dugun lehiarik estuena eskainiko du saioak. Sariak merezi du: Eivissara bidaian joango dira hirugarren edizioko kuadrilla jatorreneko sei gutarrak.
Gutar jatorrenetan jatorrena nor den ere jakingo dute. Saioaren jarraitzaileen boto gehien jaso dituena izango da jatorrenetan jatorrena, eta 500 euroko saria jasoko du.
'Gu ta Gutarrak' saioaren hirugarren edizioak aurreko bien audientziak gainditu ditu. Publikoaren fideltasuna lortu du saioak, eta egunez egun ugaritu egin dira Euskal Herrian gutarzaleak. Batez beste, % 3,5eko audientzia zatia lortu du hirugarren denboraldiak ikusle euskaldunen artean, eta 51.000 ikus-entzuleko audientzia metatua Euskadin eta eragin eremuan. Nabarmentzekoa da, gainera, asteleheneko saioak lortutako datua: % 6,2ko kuota bereganatu zuen euskaldunen artean.
Hirugarren edizioari amaiera jarriko dio Gutarren Final Nagusiak gaur, 21:00etatik aurrera. Irailean, baina, saioa berriz itzuliko da ETB1era.
