Gure Kasa
21:30ean
'Gure Kasa' denboraldi berriarekin itzuliko da gaur gauean
EITB
Julen eta Antton Telleriak aurkezten duten saioak bere espirituari eutsiko dio bigarren denboraldi honetan, eta, bereziki, kulturari eta kirolari lotutako aurpegi ezagunak gonbidatuko dituzte platora.
Informazio gehiago (1)
Gaur gauean ekingo dio 'Gure Kasa'k bere bigarren denboraldiari, bere espirituari eutsiz. Batez ere, kulturari eta kirolari lotutako aurpegi ezagunak gonbidatuko dituzte platora Julen eta Antton Telleriak. Hasteko, punta-puntako gonbidatu bat izango dute: Imanol Agirretxe, urte askotan Anoetako ateetako sareak zulatu dituen aurrelari aparta. Duela bi aste iragarri zuen futbol profesionala utziko duela, eta datorren larunbatean, Bartzelonaren aurkako partidan, egingo diote agurra realzaleek.
Julenek eta Anttonek Zuriñe izango dute berriz ere alboan. Uda ostean, beste itxura batekin itzuliko zaigu Aitziber Garmendiak hezurmamitzen duen pertsonaia. Halaber, platoan ere berrikuntzak ikusiko ditugu.
Aurkezleekin batera, ohiko kolaboratzaileak itzuliko dira: Iban Garcia, Nerea Alias, Naiara Gago, Aitor Frantsesena, Maddalen Arzallus, Asisko Urmeneta eta Onintza Enbeita.
Iban Garcia Euskal Herriko ekitaldi ezberdinetara bidaliko dute erreportari lanetan, eta oraindik gure saiora etorri ez diren gonbidatuen bila joango da. Lehen ahalegina Benito Lertxundi artistarekin egingo du.
Nerea Aliasek artxiboa arakatzen jarraitzeaz gain, Oroitzapenen kaxa estreinatuko du. Gonbidatuen herrira joan, eta beraien lagun, irakasle edo familiakoekin hitz egingo du.
Aitor Frantsesenak gaitz fisiko eta mentalak izan arren bizitzari bizipozez aurre egiten dioten lagunak aurkeztuko dizkigu.
Kolaboratzaile berriak ere izango dituzte: Aneguria rap abeslaria eta Maitane Salinas kazetari eta aktorea. Aneguriak bat-bateko abestiak sortuko ditu gonbidatuaren inguruan eta Maitena Salinasek Gurea da! tartea aurkeztuko du. Euskal Herrian sortzen ditugun eta munduan saldu eta zabaltzen diren produktu, gauza edo bitxikeriak hurbilduko dizkigu.
Irailean 'Gure Kasa'n egongo diren gonbidatuen artean, hauek izango dira: Amets Arzallus, Zuriñe Hidalgo, Iñaki Artola, Izaro Andres, Gorka Aginagalde, Jon Maia, Inaxio Perurena eta 'Oreina' filmeko lantaldea. Urrian, berriz, Xabier Madariaga, Koteto Ezkurra, Andoni Ortuzar, Fermin Muguruza, Edurne Ormazabal eta Arnaldo Otegi hartuko dituzte platoan.
'Gure Kasa' astelehenetik ostegunera izango da ikusgai eitb.eus-en eta ETB1en, 21:30ean.
