Loiun eta Urruñan izandako bertso-afariak, 'Hitzetik Hortzera' saioan

Loiuko Lauroeta auzoan eta Urruñako Pausu auzoan egindako bertso-afariak izango dira aste honetako 'Hitzetik Hortzera' saioan. Gainera, Bilbotik ibilaldia egingo dute Jon Artanok eta Xabi Paya bertsolari bizkaitarrak. Gaur gauean, 21:00etan, ETB-1en izango dugu ikusgai.

Arkaitz Estiballes eta Xabi Paya Louiko Lauroeta auzoan izan dira bertan egindako afari batean izandakoei afaloste ederra pasa arazten. Txarri-boda egiten da beti sasoi honetan Aurregoiti jatetxean eta bertan izan dira bertsolari bizkaitarrak eta baita urtero bertaratu ohi diren bertsozaleak ere, Joxe Elorrieta ELAko idazkari nagusi izandakoa, tarteko. Honen presentzia ezin aintzakotzat ez hartu eta epelak entzun behar izan zituen Elorrietak. Barre algara ederrak eragin zituzten honen gaineko bertsoek.

Bertan izan aurretik, Bilbon ibili dira Xabi Paya eta Jon Artano. Vista Alegre zezen-plazan hasi dute ibilaldia. Izan ere, hamaika aldiz aritu da Paya ikasle taldeei Bilboko sekretuak erakusten, eta Artanori ere hainbat kontu kontatu dizkio hiriari buruz.

Korrika Kulturalaren karietara Urruñan

Urruñako Xaia ostatuan egindako bertso-afari musikatuan ere 80ren bat lagun bildu dira. Maddi Ane Txoperena, Amets Arzallus, Miren Artetxe eta Egoitz Zelaia hendaiarrak izan dira bertan bertsotan.

Gaur gauean, 21:00etan, ETB-1en, eta geroztik, Nahieran. Igande bazkalostean 20 minutuko laburpena emango dute.