Jon Maia bertsolaria eta Jon Maya dantzaria, 'Zuek Hor!!' saioan

Gaur, 'Zuek Hor!!' saioan, izen berdina duten bi gonbidatu izango dituzte: Jon Maia bertsolaria eta Jon Maya dantzaria.

Maia bertsolaria Urretxun jaio zen baina zumaiarra da. 11 urterekin hasi zen Zumaiako bertso-eskolan, eta bertsolaritza munduan erabat murgilduta dabil ordutik. Beste alor askotan lanean aritu da, baina bertsolaritza omen da hasieratik etenik gabe landu duen esparru bakarra.

Maya dantzaria, bere aldetik, Errenteriakoa da. Ikasketaz kazetaria bada ere, Kukai dantza konpainiako partaide eta zuzendaria da gaur egun. Bertan, euskal dantza tradizionaletik abiatzen dira ikuskizun garaikideak sortzeko.

Anjel Alkainek eta Aitziber Garmendiak gidatuko dute saioa, baina bertan izango dira, nola ez, Andoitz eta Gorane haurrak, La Jaio txoni poligonera, Argiñano eta Berasategi sukaldariak eta Paulino.

Gonbidatuen ezkutuko biografiak (fikziozko biografiak) emango dituzte ezagutzera, eta Lazkao Txiki edota Pernando Amezketarra ere bertan izango dira galderak egiten.

Aitzol Barandiaran bertsolariak biribilduko du saioa. Elkarrizketan zehar gonbidatuek aitortu dituzten bitxikeriekin bertso bertsio musikatu bat egingo du zuzenean Zukutu Band taldearen ezinbesteko laguntzarekin. Saio guztietan zuzeneko musika jartzeaz arduratzen den talde zoragarria da Zukutu Band.

'Zuek Hor!!' gaur, 22:30etik aurrera, izango da ikusgai, ETB1en.