AEBk Ilargia aztertzeko baimena eman dio enpresa pribatu bati

Hegazkintza Administrazio Federalak (FAA), hau da, Ameriketako Estatu Batuetako gobernuko agentzia federalak, Ilargiaren ustiapen industriala ikertzeko baimena eman dio egoitza nagusia Floridan duen enpresa pribatu bati, historian lehen aldiz.

Hala, FAA agentziak ohar baten bidez jakitera eman duenez, “Ilargira bidaliko duten zundak ez du herritarren osasuna ezta segurtasuna ere arriskuan jarriko, eta herrialdearen interesak edo nazioarteko betebeharrak bere horretan jarraituko dute”.

Horrenbestez, Moon Express enpresa estatubatuarrak zunda Ilargira bidaltzeko baimena lortu du, eta Lurraren ondoan dagoen satelitera iristen denean, “jauzi” txikiak emanez mugituko da.

Ikertzaileek MX-1E izena jarri diote misioari, eta Ilargiaren baliabide naturalek (besteak beste, platinoa eta helio-3 isotopoa) ustiapen industrialerako balio ote duten ikertzea du helburu. Orain arte, soilik fikzioak frogatu du baliabide horien bidegarritasuna.

Bestalde, kanpo-espazioaren azterketari buruzko hitzarmenaren arabera, “gobernuz kanpoko erakundeek akordioa sinatu duten herrialdeen baimena eta ikuskapena izan behar dute kanpo-espazioan, Ilargia eta zeruko beste gorputz batzuk barne, ikerketak egin ahal izateko”.

Alde horretatik, aeronautika eta espazioaren agentzia estatubatuarrak (NASA), aukera eman nahi die espazioa aztertzeko asmoa duten enpresa pribatuei, Nazioarteko Espazio Estazioarekin gertatzen den moduan.