Mundua
Beste tiroketa bat AEBetan
Gizon batek 8 pertsona hil ditu Virginiako landa eremu batean
Erredakzioa
Ustezko hiltzailea, 39 urteko gizonezko bat, baso batean inguratuta euki dute poliziek. Gau guztia basoan eman ondoren, errenditu da, eta Poliziak dagoeneko atxilotu egin du.
Gutxienez zortzi pertsona tirokatuta hil dira Virginiako estatuaren (AEBak) erdiguneko lana eremu batean, bertako hedabideek informatu dutenez.
Tom Molinar estatuko Poliziaren bozeramaileak azaldu duenez, biktimetako zazpi Appomatox konderriko etxe baten barruan edo kanpoan agertu dira hilik. Bestea kalean zegoen.
Poliziak identifikatu egin du tiroen ustezko egilea. CNN telebista katearen arabera, 39 urteko gizonezko bat da.
Larrialdi zerbitzuek eguerdian (hango ordua) jaso zuten lehen deia. Horretan, gizonezko bat lurrean etzanda eta antza larri zaurituta zegoela ohartarazi zion herritar batek.
Segurtasun indarrak hara bertaratu zirenean, susmagarri bat ikusi zuten alboko baso batean, eta haren atzetik joan ziren.
Gizonezkoa inguratuta egon da, eta azkenean errenditu egin da.
Duela hiru urte, beste sarraski bat izan zen estatu berean. Garai hartan, ikasle batek 33 pertsona hil zituen Virginia Tech Universitatean.
