Mundua
Habanan
Lula Fidel Castrorekin bildu da Zapata hil den egunean
Erredakzioa
Kubako buruzagi ohiak eta Brasilgo presidenteak bilera "hunkigarria" egin dute, Karibeko irlako hedabideek zabaldu dutenez.
Fidel Castro Kubako buruzagi ohiak eta Lula da Silva Brasilgo presidenteak bilera "hunkigarria" egin dute Habanan, agintari brasildarrak Karibeko irlara egin duen azken bisita ofizialaren baitan, bertako hedabideek jakitera eman dutenez.
Kubako prentsak erakutsi dituen argazkietan ikus daitekeenez, Lula eta Castro zoriontsu ageri dira hitz egiten mahai baten inguruan eta bi solairuko etxebizitza bateko lorategian.
Brasilgo presidenteak komunikabideei esan zien 83 urteko Fidel Castro "ikaragarri ondo" ikusi duela. Estatuko telebistak esan zuen bi agintariek "elkarrizketa lagunkoia" izan zutela hainbat gairen inguruan, Kopenhageko aldaketa klimatikoaren goi-bilera eta Rioko Taldearen bilera tarteko.
Baina bilera krisi politiko betean harrapatu du Lula da Silva, Orlando Zapata Tamayo preso politikoa hil baitzen 85 eguneko gose grebaren ostean, agintari brasildarra irlara heldu zen egunean bertan.
