Mikel Laboa eta hiesa izango ditugu hizpide asteburuan

Mikel Laboa katedraren zuzendaria, Juan kruz Igerabide idazlea, programan izango dugu. Durangoko Azokaren bezperetan, Izaskun Estonba irakasleak irakurketaren garrantzia azpimarratuko digu, eta bereziki zaletasun hori haurrengan sustatzeko aholkuak emango dizkigu. Bertso Txapelketa Nagusiari ere egingo diogu aipamena. Txapelketako saioa Maulen egiten den egunean, Mitxel Etxebeste auzapeza izango dugu programan, eta turismo aholkuak jasoko ditugu. Larunbateko saio amaieran, Pirritx, Porrotx eta Marimototsen ikuskizun berrirako sarrerak zozkatuko dituzte BECen egingo duten ikuskizunerako.

Igandean, berriz, Hiesaren kontrako Nazioarteko Eguna hizpide hartuta, hiesarekin bizi diren Joseba Rekalde eta Josu Unanue izango ditugu programan. Eta Osakidetzak eman berri dituen datuak aztertuko ditugu Arantza Arrillaga prebentzioan lan egiten duen adituarekin. Horretaz aparte, Estitxu Fernandezek bere liburu berria aurkeztuko digu: Gure erditzearen jabe. Iruñeko talde baten emanaldi akustikoa ere izango dugu. The Icer Company taldea izango dugu estudioan. Eta, amaitzeko, sarera salto eginda, #mundiala, eta jatetxeetan smartphoneak nola, zertarako eta zenbat erabili beharko liratekeen galdetuko dugu, besteak beste.