Santa Luzia azoka eta René Cassin sariak, asteartean, 'Faktoria'n

Santa Luzia azokara begira egongo gara asteartean, 'Faktoria' saioan. Gainera, René Cassin saria eskuratuko dituzten Zaporeak proiektua eta Itsas Salbamendua ere gonbidatu ditugu gurera.

07:00etan hasiko da saioa eguneko albiste nagusien errepasoarekin. 08:00etan, Maite Artolak hartuko du gidaritza, eta Santa Luzia azokara joko dugu, Igotz Alkortarekin bat egitera. 08:30ean, solasaldian izango ditugu Joxe Juan Gonzalez de Txabarri, Laura Mintegi eta Mikel Aramendi. 09:00etan, Nadia Nerea neskatoari lotutako ustezko iruzurrari lotuta, Maialen Martijarekin hitz egingo dugu. Bere seme-alabek haren gaixotasun bera dute, eta kasu horrek zein kalte eragin dien azalduko digu. 09:30ean, aldiz, René Cassin saria eskuratuko duten Zaporeak proiektuaren koordinatzaile Oraitz Garciarekin eta Itsas Salbamenduko kide Iñigo Unzetarekin hitz egingo dugu. Azkenik, Eli Larrinagaren sinadura izango dugu.

10:00etan, Manu Etxezortuk hartuko du lekukoa, 'Faktoria Magazina' abiatzeko. Lehenik eta behin, Gaindegiak Udalbiltzarentzat egin duen 'Euskal Herriko geografia  demografikoa: bilakaera eta joera' azterlanaz hitz egingo digu Imanol Esnaolarekin. Jarraian, aktualitatea puri-purian ekarriko digu Jon Santxezek. Ondoren, 'Ekosfera'ren leihoa zabalduko du Jokin Aldazabalek, eta Jokin Zabalarekin batera, Urola Garaiko baserritarrak izango ditu hizpide.

11:00etan, Igotz Alkortarekin bat egingo dugu berriz Zumarraga-Urretxun. Ondoren, Sound of roots dokumentalaren egileek kontatuko digute ska eta reggae musika nola iritsi ziren guregana eta nolako garrantzia izan duten. 11:30ean, azkenik, 'Direnak eta ez direnak' tartean, hizkuntza hegemonikoak vs euskara izango dituzte mintzagai Carlos Cidek eta Xabier Amurizak.

12:00etan, berriz ere joko dugu Santa Luzia azokara. Segidan, 'Sukaldari Dema' izango dugu Pili Manterolarekin eta Igor Zalakainekin. Saioa amaitu aurretik, Amancay Gaztañagarekin ere hitz egingo dugu.

07:00etatik 13:00etara ariko da lanean 'Faktoria'.