Urdaibai, fikzioko agertoki, 'Faktoria' saioan

'Presuntos culpables' izeneko telesaila grabatzen hasiko da Boomerang ekoiztetxea, astelehen honetan, Urdaibain. Bermeon eta Mundakan egingo dituzte grabazioak, eta Mundaka bertan hartuko du ostatua lantalde zabalak. Urdaibaiko inguruak, gero eta tiradizo handiagoa dute, fikzioko eszenaleku gisa, eta hala aitortu zioten joan den astean Europako bigarren lekuan jarri zuten sariek. Horrek inguruan duen eraginaz alkate, herritar eta profesionalek diotenekin erreportajea osatu du Oihane Yustosek. Astelehenean, goizeko 09:30etik aurrera izango da entzungai ''Faktoria'n.

07:00etan hasiko da albistegia Iñigo Alustizak gidatuta. 07:50 aldera, Maite Artolak hartuko du lekukoa, eta Maddalen Arzallusen sinadura entzungo dugu. 08:00etan, Wallapop, Ebay eta Vibboko irabaziak deklaratu behar izateaz hitz egingo digu Niko Cuencak. 08:30ean, Jose Ramon Beloki, Ramon Etxarreta eta Julen Mendoza arituko dira aktualitateari buruzko analisian, Maite Artolak gidatuta. Besteak beste, adimen urritasuna eta buruko gaixotasuna dutenek boto eskubidea izateko abiatu den lege-aldaketa prozeduraz mintzatuko dira. 09:30ean joko dugu Urdaibaira, eta astelehenero bezala, Bernardo Atxagaren bisita jasoko dugu hamarrak jo aurretik.

10:00etan, Manu Etxezortuk hartuko du magazinaren gidaritza, eta, hasteko, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, Martin Gartziandia Gasteizko sindikoak hainbat zalantza argituko digu. 11:00etako kirol aurrerapenaren ostean, meditazioaz hitz egingo dugu David Alvearrekin. 11:30ean, Erokomeri erromeria talde gaztea ezagutuko dugu. 12:00etan, Kutxa Ekogunea tartea zabalduko dugu, eta, segidan, Xabier Sukiarekin zabalduko dugu Whatsapp bidezko Kopla Txapelketaren tartea. Saioa amaitzeko, Tania Arriagaren 'Harriadak' entzungo ditugu, eta lehiaketa izango dugu.

07:00etatik 13:00etara izango da martxan 'Faktoria'.