Hiztegi poetikoa gaur 22:00etan 'Lizardiren Baratzean'

Harkaitz Cano idazlearen eta Joseba B. Lenoir musikari eta konpositore nafarraren laguntzarekin aurkeztu dute 'Irudi mintzatuen hiztegi poetikoa' proiektua, Donostiako Garoa liburu-dendan. "Irudi mintzatuen hiztegi poetikoa" euskarazko hainbat esamolderen bideo bidezko hiztegi/bilduma bat sortzea bilatzen duen proiektua da. Hiru gazte dira proiektua aurrera eramateko arduradunak: Maider Fernandez eta Maria Elorza donostiarrak eta Aitor Gametxo lekeitiarra. Horren bidez, galtzen ari diren esamoldeak jaso nahi dituzte eta, aldi berean, Euskal Herriaren erretratu liriko bat egin. Oraingoz, bost dira ikus-entzunezko hiztegi berria osatzen duten esamoldeak: dzanga egin, hotza bazkatu, Saran astia, Zohardi tipil eta hazitarako geratu.

Esamolde horien esanahiaz gain, Hitzen heriotza Bernardo Atxagaren poema lehen aldiz entzun ahal izango dugu egilearen beraren ahotsean, gaur gauean, 'Lizardiren Baratza' saioan.