Bilbao Basketek bolada ona berreskuratu nahi du

Bilbao Basketek UCAM Murtzia hartuko du asteazken honetan, Bilbao Arenan (20:30). Bilboko taldeak bolada ona berreskuratu nahi du, Cajasolen eta Caja Laboralen kontra bi porrot jarraian jaso ostean. Gainera, Errege Koparako sailkapena bideratu nahi dute bizkaitarrek.

Bi porrot horien ondorioz 'beltzezko gizonek' atzerapausoa eman dute sailkapenean, seigarren postura arte. Bilbotarrak CAI Zaragozarekin berdinduta daude, baina bi garaipeneko errenta dute bederatzigarren postuarekiko eta lehen itzulia amaitzeko bost neurketa geratzen dira.

Fotis Katsikarisen taldearentzat aste erabakigarria da; izan ere, Murtziaren eta Blusens Monbusen kontra garaipena lortuz gero Errege Kopako sailkapena berma dezakete bilbotarrek. Gasteizko Errege Kopa otsailean jokatzea denboraldiko helburu nagusietako bat da.

Raul Lopezen egoera fisikoa Greziako entrenatzailearen kezka nagusia da. Lopezek ezin izan zuen jokatu Buesa Arenan, igandean, eta biharko zalantza da giharretako arazo batengatik.