Bilbao Basketek Kopa ahaztu eta sailkapena bideratu nahi du

Uxue Bilbao Basketek Gasteizko Errege Kopan, iragan astean, hartutako desengainua ahaztu eta Eurocupeko final-laurdenetarako sailkapena bideratu nahi du CEZ Nymburken aurka. Partida astearte honetan jokatuko da CEZ Arenan, Pardubicen (Txekiar Errepublika).

Valentziari bi aldiz jarraian irabazi ostean, Fotis Katsikarisen taldeak gauzak alde ditu; izan ere, Nymburki irabazita hurrengo faserako txartela ia poltsikoan izango luke. Gainera, Nymburk ia lehiaketatik kanpo dago.

Are gehiago, Nymburki irabazi ezkero eta Valentziak Rigan galduta, Bilboko taldea final-laurdenetan egongo litzateke. Bihar galduta, oraindik datorren astean Miribillan Rigari irabazteko aukera izango luke Uxuek.

Radoslav Rancikekin eta Drew Naymickekin kontu handia izan beharko dute bilbotarrek; izan ere, Last 16ko lehen jardunaldiko partidan 50 puntu eta 57ko balorazioa lortu zuten bien artean, eta bizkaitarren porrota ahalbidetu zuten (83-85).

Jiri Welch eskoltak, Miljan Pavkovic antolatzaileak eta Vojtech Hruban eta Petr Benda hegalekoek txekiarren mehatxua osatzen dute. Lukas Palyza eta Pavel Houska hegalekoek, eta Radek Nekas eta Tomas Pomilaek pibotek nohizbehinka ere ekarpena egiten dute.