Bilbao Basket
Igandean, 12:40ean
Uxuek hirugarren postua berreskuratu nahi du, Estudiantesen aurka
Erredakzioa
Fotis Katsikarisen taldeak baja garrantzitsuak ditu, eta aurrean Txus Vidorretak zuzendutako Asefa Estudiantes arriskutsua izango dute.
-
Bilbao Basket-Estudiantes. Argazkia: EFE
Bilboko taldeak sailkapeneko hirugarren postua berreskuratu nahi du, Asefa Estudiantes etxetik kanpora gaindituta. Fotis Katsikarisen mutilak Bartzelona Regalekin berdinduta daude, baina Xavi Pascualen taldeak basket-averagea bere alde du.
Uxue Bilbao Basketek Txus Vidorreta bilbotarrak zuzendutako taldea izango du aurrean. Bizkaiko taldeak jokalari garrantzitsu ugari minduta ditu, eta Vasileiadis eta Raul Lopez baja izango dira, ziur.
Raul Lopezek minutu batzuk jokatu zituen Ratiopharmen kontra, baina oraindik giharretako lesioa ez du guztiz gainditu. Horregatik Katsikarisek aulkian utziko du Kataluniako jokalaria. Alex Mumbru eta Lamont Hamilton ere entrenamenduetatik at egon dira, baina Estudiantesen aurka jokatzeko prest egongo direla dirudi.
Uxuek garaipen garrantzitsua lortu zuen Blancos de Ruedaren aurka, eta Madrilen bolada onarekin jarraitzeko abagune aparta izango du.
