Bilbao Basketek bigarren partida irabazi nahi du, Sassarin

Bizkaiko taldeak bigarren garaipena lortu nahi du Eurokopan, Endesa Ligan bi porrot mingarri jaso ondoren. Bilbao Basketek Europako txapelketa garaipenarekin hasi zuen, Cedevitari Miribillan irabazi ondoren, baina Pueyoren gizonek beste garaipen bat bai ala bai behar dute ligan konfiantza hartzeko.

Taldeak atzerapausoa eman zuen Fuenlabradan. Bilbao Basket nagusi izan zen ia norgehiagoa osoan, baina Madrilgo taldeak emaitza irauli zuen azkenengo minutuetan. Bilboko taldeak porrota ahaztu nahi du, eta Dinamo Sassariren aurka garaipena bilatuko du, etxetik kanpora.

Sardiniako taldeak AEBeko eta Italiako jokalariz osatutako bosteko orekatua du, eta Pueyoren gizonek gogor borrokatu beharko dira. Alex Mumbruk (Endesa Ligako bigarren jardunaldiko jokaalririk onena izendatua) eta Raul Lopezek Bilboko taldearen erasoa gidatu beharko dute, kanpoko jaurtitzaileen laguntzarekin.

Jarraitu norgehiagoka zuzenean ETB1en eta eitb.com-en, asteazkenean, 20:30etik aurrera.