RETAbet Bilbao Basketek garaipena behar du Khimkiren aurka

RETAbet Bilbao Basketek Khimiren aurka jokatuko du Eurokopako partida gaur, 20:30ean, Casillako pabiloian. Norgehiagoka zuzenean eskainiko dute eitb.eus webguneak eta ETB1ek.

Casilla pabiloira itzuliko da Bilbao Basket, 2000. urtean jaiotzen ikusi eta 2009an agur esan zion kantxara. Gainera, Khimkiren aurka jokatu zen Casilla agurtzeko partida.

Halere, talde bizkaitarrak garaipena behar du Eurokopan etorkizuna gehiago ez zailtzeko. B multzoko lehen itzulia itxiko du partida honekin, eta, oraingoz, garaipen bakarra lortu du Bilbao Basketek. Carles Duran entrenatzaileak jokatzeko prest izango ditu Ivan Buba eta Michael Eric. Jonathan Tabuk, ordea, min hartuta jarraitzen du, eta oraindik ez dago jokatzeko moduan.

Aurkari zaila izango du Bilbao Basketek. Khimki taldeak diru asko du, eta jokalari oso onak fitxatu ditu. Euroligako maila duela esan daiteke, baina Dusko Ivanovicek zuzentzen duen taldeak porrota jaso zuen Fuenlabradaren aurka (89-85) bigarren jardunaldian.

Errusiako taldeak jokatzeko prest izango du lesio batetik atera berri den Alexei Shved NBAko jokalari ohia. Marko Tododrovic Bilbao Basketeko jokalari ohia ere errusiar taldean dago. Kalitate handiko jokalari gehiago ditu: Jacob Pullen, Earl Rowland, Nobel Biongou-Colo, Sergei Monia, Markel Brown, Robbie Hummel eta Jeremy Evans.