Bilbao Basket
Bilbao Arenan
Bilbao Basket-Meridiano Alicante (71-59): Etxean sendo jarraitzen dute
Erredakzioa
Bizkaitarrek nahi baino gehiago sufritu dute norgehiagoka irabazteko. Mumbru, Banic eta Jackson erabakiorrak izan dira talde beltzaren garaipenean.
Etxean sendo jarraitzen dute Katsikarisen mutilek, Meridianoren aurka garaipen neketsua lortu ostean. Lehen zatian lan aparta egin dute bizkaitarrek erasoan eta alde nabarmena lortu dute markagailuan (42-31). Hala ere, hirugarren laurdena Alacanteko taldearen izan da eta azken laurdenean bilbotarrek lan ona egin behar izan dute garaipena lortzeko. Mumbru, Banic eta Jackson taldeko onenak izan dira.
Fotis Katsikarisen mutilak partida apurtzera irten dira, baina Meridiano ere estutzera irten da eta bi taldeek saskiraketa onak lortu dituzte. Banicek eta Mumbruk saskiraketa erbakiorrak sartu dituzte talde beltzarentzat eta bilbotarrek 10 puntuko aldea lortu dute, 24-14 lehen laurdenaren amaieran.
Bigarren laurdenean Hernandez-Sonsecak lan bikaina egin du taula azpian eta Banicek eta Aaron Jacksonek bizkaitarren saskiraketak jarri dituzte. 39-21ekoa aldea lortu du Bilbao Basketek eta eroso egon dira kantxan atsedenaldira arte. Bigarren laurdenaren amaieran emaitza 42-31koa izan da.
Hirugarren laurdenean Alacanteko taldeak seriotasun handiarekin jokatu du eta Doellman eta Heurtelen saskiraketei esker, markagailuan asko hurbiltzea lortu dute. Katsikarisen taldeak akats ugari egin ditu erasoan eta ez dituzte saskiraketa errazak lortu, Meridianoren defentsa gogorra izan delako. Laurdenaren bukaeran emaitza asko estutu da, 56-52koarekin.
Azken laurdenean etxekoek ondo kontrolatu dituzte baloiaren jabetzak eta Hernandez-Sonsecaren lana ezinbestekoa izan da. Chris Warrenek puntu garrantzitsuak lortu ditu bizkaitarrentzat eta talde beltzak aldea mantendu du markagailuan, 63-56. Meridiano hurbiltzen saiatu da, baina ez dite saskiraketa erabakiorrak sartu. Azken emaitza 71-59koa izan da.
Fitxa teknikoa:
71 - Bizkaia Bilbao Basket (24+18+14+15): Aaron Jackson (10), Warren (11), Mumbru (9), Banic (14) eta Mavroeidis (7) -hasierako bostekoa-; Javi Rodriguez (1), Vasileiadis (4), Blums (4), Hervelle (-), Sonseca (11) eta Vazquez (-).
59 - Meridiano Alicante (14+17+21+7): Heurtel (12), Alex Urtasun (3), Stojic (3), Doellman (14) eta Sow (4) -hasierako bostekoa-; Llompart (6), Erdogan (9), Cazorla (2), Andriuskevicius (6), Rejón (-) eta Weigand (-).
