Bilbao Basket
Endesa Liga
Gescrap Bizkaia-Valentzia (85-74): Garaipen erosoa
Erredakzioa
Katsikarisen taldeak konfiantza berreskuratzeko garaipen garrantzistua eskuratu dute Bilbao Arenan. Paco Olmosen taldeak akats gehiegi egin ditu eta ezin izan du norgehiagokako emaitza irauli.
-
Gescrap Bizkaia-Valentzia (85-74). Argazkia: EFE
Garaipen garrantzitsua eskuratu du Gescrap Bizkaiak Valentziaren aurka (85-74). Euroligan porrot mingaria jaso eta gero Miribillako zaleek eta talde beltzak animoak berreskuratu dituzte garaipen erraz, baina borrokatu batekin.
Bilbao Basketek erraz agindu du partidako aurreneko minutuetan eta Mumbruk eta Banicek ederki gidatu dute Gescrapen erasoa 11-0ekoa lortzeko. Pixkanaka Valentzia suspertzen hasi da eta kanpoko jaurtiketei esker markagailuan hurbildu dira laranjak. De Colok 18-12 jarri du markagailuan, baina Katsikarisen taldeak sakatzen jarraitu du eta Miribillako zaleen laguntzarekin 24-14ko markagailuarekin bukatu da lehenengo laurdena.
Bigarren laurdenean Valentziako taldeak akats gehiegi egin ditu erasoan eta Bilboko taldeak markagailuan aldea handitu egin du. Mavroeidisek eta Aaron Jacksonek puntu garrantzitsuak eskuratu dituzte eta Gescrap Bizkaia nagusi izan da kantxan. Caner-Medleyk soilik lortu ditu puntuak talde laranjarentzat eta atsedenaldia baino lehen, 48-36 goitik izan dira beltzak.
Fotis Katsikarisen taldeak erasoan asko sakatu du atsedenaldia eta gero eta Gescrap Bizkaiak 20 puntuko aldea lortu du (60-40). Fischerrek eta Aaron Jacksonek gidatu dute taldea eta Paco Olmosen mutilek ezin izan dute defentsan eutsi. Hirugarren laurdena Bilboko taldearentzat 20 puntuko aldearekin bukatu da (68-48).
Azkenengo laurdenean Bilbao Baksetek norgehiagoka erabakita utzi du saskiraketa azkarrei esker eta Valentzia Basketek ezin izan du markagailua irauli. Nando De Colok lortu ditu puntuak talde laranjarentzat, baina Katsikarisen mutilek defentsan ederki eutsi dute eta neurketa 85-74koarekin bukatu da.
- Fitxa teknikoa:
85 - Gescrap Bizkaia (24+24+20+17): Jackson (12), Blums (8), Mumbru (12), Banic (17) eta D'or Fischer (10) -hasierako bostekoa-; Raul Lopez (2), Josh Fisher (4), Grimau (2), Vasileiadis (10), Hervelle (-) eta Mavroeidis (8).
74 - Valentzia Basket (14+22+12+26): Markovic (3), Abia (2), Martinez (12), Caner-Medley (21) eta Lishchuk (10) -hasierako bostekoa- San Miguel (6), De Colo (12), Kuksiks (-) eta Ogilvy (8).
