Real Madridl-Lagun Aro GBC (82-74): Ezustekorik gabe

Lagun Aro GBCk seigarren porrota jaso du Endesa Ligan Real Madrilen aurka 82-74 galduta. Bi garaipen eta sei porrotekin geratzen dira gipuzkoarrak sailkapenean.

Partida gaizki hasi zen talde gipuzkoarrarentzat. Real Madril indartsu kantxaratu zen eta 9-0eko partziala lortu zuen hasi eta bere ahala. Lagun Aro galduta ibili zen laurden guztian zehar eta lehen hamar minutuak 13 puntuko abantailarekin bukatu zituen Real Madrilek.

Bigarren laurdenean Lagun AROren hobekuntza ikaragarria izan zen. Laurdenaren hasiera bikaina burutu zuten gipuzkoarrek eta atsedenaldira iristeko 7 minutu falta zirenean partida berdindu zuten (27-27). Jarraian norgehiagokan lehen aldiz aurrea hartu zuen markagailuan Gipuzkoa Basketek (27-29). Sito Alonsok zuzentzen duen taldearen minutu onenak ziren, baina Madrileko taldeak garaiz erreakzionatu zuen eta maila ona erakutsita berriro aldea lortu zuen markagailuan. Partida 49-39ko emaitzarekin iritsi zen atsedenaldira.

Atsedenalditik bueltan partida oso berdindua izan zen. Lagun Arok zailtasunetan jarri zuen Real Madril, baina Lasoren mutilek gutxi-gora behera lortu zuten aurretik lortutako aldea mantentzea. Etxeko taldearen aldeko bederatzi puntuko abantailarekin bukatu zen hirugarren laurdena (66-57).

Azken laurdenean saiatu zen Lagun Aro markagailua berdintzen, baina aldeak murriztea eta markagailuan gerturatzea besterik ez zuen lortu. Real Madrilek lan egin behar izan zuen, baina ondo kontrolatu zituen azken minutuak. Bukaeran, Real madrilen garaipena 82-74ko emaitzarekin.

Fitxa teknikoa:

82 - Real Madril (25+24+17+16): Rudy (13), Suarez (7), Mirotic (12), Llull (8) eta Begic (8) -hasierako bostekoa-, Tomic (10), Pocius (8), Reyes (2), Carroll (2), Rodriguez (4) eta Ibaka (8).

74 - Lagun Aro GBC (12+27+18+17): Panko (19), Neto (8), Vidal (5), Baron (15) eta Betts -hasierako bostekoa-, Papamakarios, Lasa, Doblas, Salgado (11), Adeleke (12) eta Lorant (4).