Baskoniak garaipenaren bidera itzuli nahi du Herbalifen aurka

Caja Laboralek Herbalife Kanaria Handia hartuko du igande honetan. Hiru lehiaketetan (Kopa, Liga eta Euroliga) azken hamar egunetan lau porrot jarraian jaso ostean garaipena bildu nahi dute arabarrek.

Endesa Ligan hamabi garaipen jarraian lortu eta gero, iragan astean Blusens Monbusen aurka galduta bolada ona eten zuten Zan Tabaken jokalariek, eta garaipenaren bidea berreskuratu nahi dute, sailkapenean aldeak mantentzeko.

David Jelinekek eskuin hankan zuntz-haustura izan zuen, baina espero baino lehenago osatu da eta minuturen bat jokatzeko aukerak ditu.

Bi partida 48 ordutan

Bi partida 48 orduren buruan jokatuko dituzte berriro gasteiztarrek. Atzo Olympiacosen aurka Euroligan laugarren porrota jarraian jaso ostean, Gasteizera itzultzeko denbora eman die arabarrei, bihar Kanariako taldea hartzeko.

Partiden pilaketak ez ditu batere ongi hartu Caja Laboralek orain arte; izan ere, arabarrek norgehiagoka eskasak jokatu dituzte atseden hartzeko denbora gutxi dutenean.

Pedro Martinezen taldeak ACBko defentsarik onena du eta azterketa zorrotza izango da Baskoniarentzat. Caja Laboral ez dago gorputzaldi onenean eta azkar jokatu ezin duenean arazo asko ditu.