Baskoniak hirugarren partida behartu nahi du

Laboral Kutxak Bartzelona hartuko du larunbat honetan (21:15ean), playoffaren final-laurdenetako bigarren partidan. Gasteiztarrek garaipena lortu behar dute, kanporaketaren hirugarren neurketa behartzeko.

Ostegunean jokatu zuten talde biek aurreneko partida, eta Gasteizko taldeak neurketa ona jokatu zuen, baina azken laurdenean garaipenak ihes egin zion. Juan Carlos Navarro eta Brad Oleson erabakigarriak izan ziren.

Larunbatean, zaleen babesa izango dute Sergio Scarioloren gizonek, baina teknikari italiarrak baja ugari izango ditu. Andres Nocionik min hartu zuen Palauko partidan, eta Mainoldik ere zalantza izaten jarraitzen du. Hangak, bestalde, oso zail dauka norgehiagoka jokatzea.

ETB-1ek eta eitb.com-ek zuzenean eskainiko dute partida larunbat honetan, 21:15etik aurrera.