Baskonia
ACB Liga
Valladolid-Caja Laboral, (78-64): Porrota lehen itzulia bukatzeko
Andoni Beldarrain
Erredakzioa
Baskoniaren aurkaria talde gasteiztarra baino hobea izan da laurden guztietan. Blancos Rueda multzo buru izango da Errege Kopan.
Caja Laboral Baskoniak galdu egin du gaur Blancos Rueda Valladoliden aurka 78-64ko emaitzarekin. Gainera, Valladolidek Baskonia harrapatu egin du sailkapenean eta bi taldeek 11 garaipeneko eta sei porroteko balantzea dute. Pucelakoak multzo buru izango dira Errege Kopako zozketan.
Partidako lehen minutuetan Baskoniak abantaila politak lortu zituen. 0-5eko partzialarekin hasi zuten norgehiagoka gasteiztarrek eta 4-10 ere jarri ziren aurretik. Dena den, etxekoek ez zuten etsi eta partida berdintzea lortu zuten (10-10). Momentu horretatik aurrera partida asko berdindu zen eta azken minutuetan Valladolidek hobeto jokatu zuen. Etxeko taldeak sei puntuko abantailarekin bukatu zituen lehen hamar minutuak (26-20).
Bigarren laurena oso berdindua izan zen. Bi taldeak ondo ibili ziren erasoan eta hobeto defentsan. Berdintasun horren eredu 15. minutuan markagailuak erakusten zuen emaitza; 28-28ko berdinketa. Azken minutuan Valladolidek gehiago asmatu zuen eta hiru puntuko abantailarekin iritsi zen Blancos Rueda atsedenaldira (41-38).
Atsedenalditik bueltan, Baskoniak azkar berdindu zuen norgehiagoka 0-3 partzialarekin (41-41). Baina ordutik aurrera Valladolid izan zen nagusi kantxan. Pixkanaka, etxeko taldea abantaila politak lortzen hasi zen eta hirugarren laurdena Blancos de Ruedaren aldeko 60-51ko emaitzarekin bukatu zen.
Azken laurdenean Valladolidek ez du arazorik izan aurreko laurdenean lortutako abantaila areagotzeko. Baskoniak ezin izan du desabantaila zazpi puntutik jaitsi. Azkenean, garaipena Valladolidek lortu du 78-64ko emaitzarekin.
Fitxa teknikoa:
78- Blancos de Rueda (26+15+19+18): Dumas (8), Van Lacke (14), Robinson (8), Nacho Martin (12), Barnes (11) -hasierako bostekoa-, Báez (7), Isaac Lopez (8), Stanic (2), Slaughter (4), Diego Garcia (4) eta Millan Lopez (-).
64- Caja Laboral (20+18+13+13): Huertas (2), Oleson (-), San Emeterio (9), Teletovic (13), Sow (-) -hasierako bostekoa-, Ribas (8), Barac (3), Logan (14), Batista (6) eta Bjelica (9).
