Guevarak bosgarren etapa irabazi du eta Daniel Diaz lider berria da

Daniel Diaz Argentinako txirrindulariak liderraren elastikoa jantzi du San Luiseko Tourraren bosgarren etapan. Mendate batean amaitu den etapa Emmanuel Guevara herrikideak irabazi du. Diaz bigarren postuan helmugaratu da.

San Luis Somos Todos taldearen lanari etekina atera dio Guevarak eta garaipena lortu du Carolinan. 169 kilometroko ibilbideak Juana Koslay eta Carolina lotu ditu.

Alberto Contador seigarren postuan sailkatu da (1:21) eta sailkapen nagusian bosgarren jarraitzen du (1:04). Michal Kwiatkowski poloniarrak denbora asko galdu du eta aurreneko hamar postuetatik kanpo geratu da.

Guevarak ihesaldi luzea egin du. Hacecky Dukla txekiarrarekin alde egin du Guevarak, baina Cerro Amagon atzean utzi du. Duklari 15 minutuko aldea atera dio, baina azken igoeran Diaz Guevara harrapatzeko zorian egon da. Guevarak herrikideari 15 segundoko abantaila baino ez dio atera helmugan.

156 kilometroko seigarren etapa bihar jokatuko da Quines eta Merlo (Mirador del Sol) artean.

Bosgarren etapa:

1. Emanuel Guevara (ARG-San Luis Somos Todos)  4:17:48

2. Dani Díaz (San Luis Somos Todos)           15 segundora

3. Miguel A. Rubiano (KOL-Androni)               1:17

4. Arnold Alcolea (KUB)                       d.b.

5. Javier Acevedo (COL-Jamis Sutter)           1:21

6. Alberto Contador (ESP-Saxo Bank)           d.b.

7. Tejay Van Garderen (AEB-BMC)               d.b.

8. Alex Diniz (BRA-Funvic)                    d.b.

9. Mauro Santambrogio (ITA-Vini Fantini)         1:41

10. Matteo Montaguti (ITA-AG2R)                  1:42

Sailkapen nagusia:

1. Dani Diaz (ARG-San Luis Somos Todos)       16:49:512

2. Tejay Van Garderen (USA-BMC)                     17 segundora

3. Alex Diniz (BRA-Funvic)                          39

4. Jurgen Van den Broeck (BEL-Lotto)                57

5. Alberto Contador (ESP-Saxo Bank)               1:04

6. Miguel A. Rubiano (KOL-Androni)               1:47

7. Vincenzo Nibali (ITA-Astana)                   2:14

8. Mauro Santambrogio (ITA-BMC)                   2:17

9. Javier Acevedo (KOL-Jamir Sutter)              2:20

10. Bart de Clercq (BEL-Lotto)                   2:34

13. André Cardoso (POR-Caja Rural)               3:16

14. Cayetano Sarmiento (KOL-Cannondale)           3:21