Jazzaren doinura dantzan, Donostian

Dena prest dago Donostian Jazzaldiaren 52. edizioa hasteko. ‘Poem of a Cell’ ikuskizun bereziarekin abiatuko da gaur, 22:30ean, Zurriola hondartzako Heineken agertokian.

Guztira, 130 kontzertu izango dira entzungai asteartera arte, tartean 35 euskal musikari eta taldeenak. Horretarako, 17 agertoki paratuko dituzte hirian, 52. Jazzaldi honetan, aurreko urtean gerturatu ziren 170.000 ikusleen marka berdintzea helburu.

Aurtengo hasiera berritzailea izango dela iragarri dute antolatzaileek; “Poem of a Cell” Stefan Winter alemaniarrak prestatutako emanaldia mundu mailako estreinaldia izango da, eta azken 400 urteetan musikak eta irudiak ikusiko dira 26 metroko luzera izango duen pantailan. Zurriolako hondartzako agertoki gainean, 60 musikari arituko dira bi orduko doako ikuskizuna eskainiz.

Bihartik aurrera, eskaintza zabala izango da; izen handi asko, Donostiako hamaika tokitan. Antolatzaileek azaldu dutenez, jazzaren izen esanguratsuak hasiberriekin uztartu nahi dituzte aurten, eta, besteak beste, Bryan Ferry, Abdullah Ibrahim, Gregory Porter, Harbie Hancock eta Macy Grayren musika izango da entzungai.

Larunbatean, Charles Lloyd saxofonistak jasoko du aurtengo Donostiako Jazzaldia saria, eta lehenago, ostiralean, The Pretendersen kontzertua hartuko du Zurriolako hondartzak.