Publizitatea
X

Irratia zuzenean

Guggenheim Bilbaoren XX. urteurrenaren ikuskizunaren egunak eta orduak

kultura

20:30etik 23:00etara

Guggenheimek 'Reflections'ekin ospatuko du larunbatera arte XX. urteurrena

Agentziak | Erredakzioa

2017/10/11

Asteazkenetik larunbatera arte, 20:30etik 23:00etara, 20 minutuko saio etengabeak eginez, argi- eta soinu-ikuskizun bat proiektatuko dute museoaren eta horren kanpoaldeko eskulturen gainean.

1:58
  • Whatsapp
  • Bidali

Asteazken honetatik, urriaren 11tik, eta larunbatera arte, hilaren 14ra arte, Guggenheim Bilbao Museoak "Reflections" ikuskizunarekin ospatuko du XX. urteurrena Bilbon. Argi- eta soinu-ikuskizun horrek efektu eta argi-irudi koloristak proiektatuko ditu museoaren aurrealdean (fatxada handienean), soinuarekin batera. Iragarpenaren arabera, eguraldi bikaina izango da horretaz gozatzeko; izan ere, zerua oskarbi egongo da, eta 14-15 gradu inguru izango dira Bizkaiko hiriburuan ikuskizuna proiektatuko duten orduetan. Nahi baduzu, ikusi "Reflections" ikuskizuna online eta zuzenean eitb.eus-en.

Aire zabalean egingo da ikuskizuna, eta, museoaren fatxadaz gain, horren kanpoaldean dauden eskultura enblematikoak ere argituko ditu: Jeff Koonsen "Puppy", Louise Bourgeoisen "Ama" armiarma erraldoia eta Anish Kapoor artistaren bola-dorrea. "Reflections"ek museoaren bildumako lan mitiko batzuk irudikatuko ditu.

Eraikina nola sortu zen ere erakutsiko du proiekzioak. "Gehryk berak egindako zirriborroa islatuko du, baita bihurgune ezinezkoen kalkulu-prozesua eta titaniozko azalaren bariazioak ere", Guggenheim museoak ohar baten bidez azaldu duenez.

Ikuskizuna 59 Productions produkzio-etxeak sortu du, 2012an Londresko Olinpiar Jokoetako hasiera-ekitaldian ere parte hartu zuen enpresak.

Aldaketak zirkulazioan

Hala, Bilboko Udalak ohar baten bidez zabaldutakoaren arabera, lau egun hauetan eskainiko den ikuskizun horren eraginez zirkulazio-aldaketak egongo dira Unibertsitate etorbidean. Etorbide hori bi noranzkoetan egongo da ibilgailuentzat itxita, Salbe eta Agirre Anaien kaleen artean, 19:30etik 23:30era, gutxi gorabehera.

Aldaketok eragina izango dute bidegorrian ere, eta baita kanpoko aparkalekuetan ere, kendu egingo baita Unibertsitate etorbideko tartean. Garajeetako sarrera-irteerak ere itxita egongo dira.

Etenaldi horiek egiten diren bitartean, Bilbobusen zenbait lineatan ere egingo dira aldaketak ohiko ibilbide eta geralekuetan.

Segurtasun-neurriak

Bestalde, Bilboko Udaltzaingoak eta Ertzaintzak segurtasun-operatibo berezia antolatu eta koordinatuko dute ikuskizunaren inguruetan. Uniformedun patruilak eta kalez jantzita diharduten agenteak arduratuko dira museoaren inguruko segurtasunaz, jende asko pilatu daiteke eta.

Iruzkinak

Publizitatea
  • Publizitatea

    Bisitatuena

      Kargatzen ikusiena
          Kargatzen ikusiena