Itxi

2021/11/24

15:56

kultura

Euskal kultura ondarea

Zabalik da Euskariana, euskal kultur ondarearen Liburutegi Digitala

Agentziak | Eitb Media

Euskal kultura ondarearen baliabide digitalizatuak kudeatzen dituzten euskal erakunde publikoen, unibertsitateen eta erakunde pribatuen lankidetzaren emaitza da ekimena, eta 750.000 multimedia objektu baino gehiago biltzen ditu.

1:22
Euskarianaren aurkezpena. EITB Mediaren bideo batetik ateratako irudia.
  • Whatsapp
  • Whatsapp
  • Telegram
  • Bidali

Euskariana Euskadiko Liburutegi Digitala aurkeztu dute asteazken honetan, Bilbon. Euskal kultura ondarearen baliabide digitalizatuak kudeatzen dituzten euskal erakunde publikoen, unibertsitateen eta erakunde pribatuen lankidetzaren emaitza da ekimena, eta 750.000 multimedia objektu baino gehiago biltzen ditu.

Bingen Zupiria Eusko Jaurlaritzako Kultura eta Hizkuntza Politikako sailburua, Ana del Val Arabako Aldundiko Kultura eta Kirol diputatua, Paco Galve Gasteizko Udaleko Kultura zuzendaria, Begoña de Ibarra Bizkaiko Aldundiko Kultura zuzendaria, Gonzalo Olabarria Bilboko Udaleko Kultura zinegotzia, Mari Jose Telleria Gipuzkoako Aldundiko Kultura zuzendaria eta Jaime Otamendi Donostia Kulturako zuzendaria izan dira Euskadiko Artxibo Historikoan egindako aurkezpen ekitaldian.

Euskal kultur erakunde, artxibo, liburutegi eta museo guztiek parte hartzen duten elkarlaneko proiektua da Euskariana. Hainbat katalogo kolektibotatik (Euskadiko Irakurketa Publikoko Sarea, Bilgunea, Ondare Bibliografikoaren Katalogo Kolektiboa) eta biltegietatik datozen funtsak biltzen ditu.

Horrela, hainbat erakunderen (Eusko Jaurlaritza, Arabako, Bizkaiko eta Gipuzkoako aldundiak, udalak eta unibertsitateak) eta Eusko Ikaskuntza, Eresbil edo Sancho el Sabio, Labayru eta Benediktinoen fundazioen (Lazkaoko beste batzuen artean) ahaleginen bilgune izan da.

Euskal autoreek sortu duten guztia, Euskadin argitaratu den guztia eta munduko edozein tokitan euskal gaiei buruz sortu den guztia jasotzea du helburu. Era berean, Euskarianak arreta berezia eskainiko dio euskaraz sortutako edo euskarara itzulitako edukiei.

Liburutegi digitala ez da ohiko liburutegia, 750.000 multimedia objektu baino gehiago biltzen baititu, hau da, euskarri fisiko oso desberdinak dituzten materialen kopia digitalak: liburuak, eskuizkribuak, egunkariak eta aldizkariak, argazkiak, material grafikoak, museo piezak, partiturak, musikako lanak eta ikus-entzunezko materialak.

Euskal kulturarako "ate digitala"

Aurkezpenaen azaldu dutenez, Euskarianak "ate digitala" izan nahi du, euskal kultur ondarearekin zerikusia duen edozein eduki sarean bilatzea ahalbidetu eta errazteko. Horretarako, ahalik eta baliabide digital gehien bildu nahi ditu euskal kulturarekin lotuta, eta bereziki, bibliografikoak, erregistroak sistematizatuz eta homogeneizatuz, materialen jatorria identifikatuz eta sortzaileen eskubideak errespetatuz. Esteken zein bere biltegiaren bidez, aipatutako materialen edukiaren zati handi bat eskuratzeko eta deskargatzeko aukera eskaintzen du.

Gainera, "kalitatezko zerbitzu publikoa" eman nahi du, publiko orokorraren edota publiko espezializatuagoaren beharrei erantzuteko, hau da, informazioa eta irakurketa atsegina bilatzen dutenetan zein ezagutza berriak sortzea helburu duten ikertzaileetan pentsatua.

Horrela, Euskariana Euskadiko Irakurketa Sare Publikoaren eta erakunde laguntzaileen erregistroak biltzen dituen katalogoa da, eta euskal ondare funtsak kudeatzen dituzten erakunde publiko eta pribatuen arteko "koordinazio estu eta ezinbestekoan" garatu da.

Ekimenaren izenaren jatorriari dagokionez, azaldu dutenez, 1836an, 'euskarienne' terminoa erabiltzen lehenak izan ziren Antoine d'Abbadie eta Agosti Xaho. Arturo Campión politikari, idazle eta hizkuntzalari euskaldunak 'euskariana' terminoa aukeratu zuen lehenago euskal gaiei buruz egunkari eta aldizkarietan argitaratutako bere hainbat idatzi bateratu eta elkarrekin kaleratzeko.

  • Bisitatuena

      Kargatzen ikusiena
      Kargatzen ikusiena
    ;