Publizitatea
Itxi

2021/04/26

07:53

Oscarrak 2021

Oscar sariak

“Nomadland” nagusi, Oscarren gauean

N. V. | EITB Media

Doluari eta kapitalismoaren ajeei buruzko lanak eraman du film onenaren saria. Berorren zuzendariak zuzendari onenaren saria irabazi du, eta Frances McDormandek emakumezko aktore onenarena

2:25
Chloe Zhao,
  • Whatsapp
  • Whatsapp
  • Telegram
  • Bidali

"Nomadland" filmak irabazi du pelikula onenaren Oscar saria, Hollywoodeko Zinema Akademiaren sarien 93. edizioan.

Chloé Zhao nomada gisa bizi diren estatubatuarrei buruzko film horren zuzendariak irabazi du, gainera, zuzendari onenaren saria, eta historia egin du horrela, ia ehun urteko historian sari hori eraman duen bigarren emakumea baita, Kathryn Bigelowk 2010ean irabazi eta gero. Hori gutxi ez, eta Frances McDormand "Nomadland"en protagonistak emakumezko aktore protagonista onenaren saria eraman du, bere ibilbideko hirugarrena "Fargo" eta "Three Billboards Outside Ebbing, Missouri" lanengatik eraman zituenen ondoren.

0:54

Kapitalismoaren hondarrak, aberastasunaren banaketa bidegabearen ajeak, erakusten dituen lanaren zuzendariak filmak irudikatzen duen eta filmatze lanetan egindako bidaia luzeetan ezagutu zuen nomaden komunitateari eskaini dio saria. “Eskerrik asko erresilentziaren eta itxaropenaren balioa irakasteagatik eta benetako ontasuna zer den gogorarazteagatik”, adierazi du Pekinen jaiotako zinemagileak ezohikoa galan egin duen hitzaldian.

2:20

Interpretazio arloan, Anthony Hopkinsek eraman du gizonezko aktore onenaren saria, "The father" lanean egindako paper hunkigarriagatik. Hopkinsek ez du galan parte hartu; ez du, beraz, “Bildotsen isiltasuna”gatik 1991n lortutakoaren ondoren bigarren Oscar saria duena aurrez aurre hartu. Halere, Hollywoodeko Akademiak saritu duen aktore nagusiena da gaurdanik, 83 urte baititu.

Bigarren mailako aktoreen ataletan, sariak Youn Yuh-jung "Minari"ko amamarentzat eta Daniel Kaluuya "Judas and the Black Messiah"n Fred Hampton Pantera Beltzen buruarena egiten duen britainiar aktorearentzat izan dira. Hegokorear aktoreak oso hunkituta jaso du estatuatxoa Brad Pitten eskuetatik, eta harrituta agertu da besteak beste Glenn Close lehiakideei gailendu zaiolako.

Close izan da, hain zuzen ere, gaueko protagonistetako bat, dantza harrigarri bati ekin baitio ustekabean, galaren erritmoa gainbehera zihoan une batean Lil Rel Howery umorista zur eta lur utzita. Umorez hartu du inork bete nahiko ez lukeen marka bat hautsi izana: Peter O'Toole berdindu du inoiz irabazi gabe izendapen gehien, zortzi, bildu dituzten aktoreen zerrendan.

Sariak, ia guztientzat

"Nomadland"ek atal nagusietan erakutsitako nagusitasunaz haraindi, sariak nahiko banatuta gelditu dira, eta gidoiaren arloan, berbarako, "Promising Young Woman"ek jatorrizko gidoi onenaren saria irabazi du eta "The father"ek gidoi egokitu onenarena.

Bestalde, "Soul"ek Pixarren lidergoa berretsi du animaziozko film onenaren atalean, eta "Druk" Thomas Vinterbergen danimarkar pelikulak irabazi du atzerriko film onenaren saria.

Sariak irabazi dituzte, halaber, "Sound of Metal"ek (editatze eta soinu onenak) eta "Mank"ek guztira izendapen gehien, hamar, bildu zituen lana, zeinak azkenean bi estatuatxo bereganatu dituen, argazkilaritza ekoizpen eta diseinu onenenak.

Gaueko porrot zaratatsuena Aaron Sorkinena izan da: "The Trial of the Chicago 7"ek sei izendapen jaso zituen, baina esku-hutsik bukatu du gaua. 

"Hala-holako gala"

Pandemiari itzuri egin behar zion Oscarren galak jakin-min handia piztu du aste osoan zehar, baina aurten ohi baino bi hilabete geroago iritsi den galak ez du erritmo handirik izan, iraun duen hiru orduetan.

Oscarren arduradunek gala ezberdina izango zela aurreratu zuten, baina agertokia eta aforoa izan dira aurtengo aldaketa bakarrak, Dolby antzokian urtero izaten diren 3.000 pertsonen aldean, 170 gonbidatu izan baitira aurten.

Steven Soderbergh Hollywoodeko Akademiaren gala diseinatzeko ardura izan duen zinemagileak gaualdi neurtu eta zurrunegia proposatu du, eta apenas utzi dion tarterik bat-batekotasunari.

Glenn Closek “Da Butt” funkyaren erritmora egindako dantza mugitua izan da publikoaren barrea atera duen une apurretakoa, Yuh-Jung Youn “Minari”ko aktorearen esker oneko solasaldiarekin batera.

Agertokira sartu eta berehala, 73 urteko hegokorearrak esan du “oso pozik” zegoela Brad Pitt saria emateko arduraduna ezagutzeaz, nahiz eta estatubatuar aktoreak bere izena txarto esan. “Baina gaur gauean denok zaudete barkatuta”, gehitu du.

Frances McDormandek ere ahoa bate hortz utzi du publikoa, “Nomadland”en egindako lanak ekarri dion saria jasotzera igo denean, ulu eginda: “Ikusi “Nomadland” eta gainerako izendatu guztiak ahalik eta pantaila handienean”, eskatu dio gero publikoari.  

Kritikak, Poliziaren indarkeriari

Regina King Oscarren galan ikusi den lehen pertsona izan da, eta agertu eta minutu gutxira hartu du hizpide AEBko polizia indarkeria, geroago Travon Freek, Tyler Perryk, H.E.R.-ek eta beste irabazle batzuek egin duten ber gisan.

“Urte izugarria izan da, eta erdialdean gaude oraindik. Eta zintzoa izan nahi dut: “Joan den astean Minneapolisen gauzak beste modu batera irten izan balira, takoien ordez protestarako botak izango nituen jantzita agian”, adierazi du Kingek George Floyd hil zuen poliziaren aurkako epaiketari buruz.

  • Bisitatuena

      Kargatzen ikusiena
      Kargatzen ikusiena
    ;