Futbolari buruzko saio arrakastatsuak eitb.com-en eta EiTB Nahieran-en

Euskal Irrati Telebistak San Mamesen agurraren inguruko eta Realak egin duen denboraldiari buruzko saio bereziak egin ditu azken bi asteetan. Gai horiekin lotutako erreportajeak eta dokumentalak ikusi ahal izan dira, eitb.com eta EiTBNahieran atarietan ere argitaratu diren edukiak hain zuzen ere. Bi atari horietan lortutako arrakasta itzela izan da, eta 100.000 ikustaldi baino gehiago izabn dituzte.

San Mamesen agurraren inguruan eta Realak Txapeldunen Ligarako lortutako sailkapenaren inguruan EiTB-k prestatutako saioak, eduki ikusienetako bihurtu dira 15 egunetan EiTBnahieran atarian. Denbora horretan 30.000 ikustaldi baino gehiago eta 8.000 erabiltzaile bakar izan dituzte erreportaje bereziek. Atari  horretan ikusleen eskura daude 'San Mames. 100 urte', 'San Mameseko arima', 'Reala Europara' eta 'Europa txuri-urdinez' erreportajeak. Horrez gain, San Mamesen Athletic eta Bizkaiko selekzioaren artean jokatutako azken partida ere ikusi daiteke.

Bestalde, eitb.com atarian bi euskal futbol taldeen inguruko hainbat bideoa argitaratu dira azken asteetan. EiTB-ren Interneteko atarian San Mamesen agurraren, estadio zaharraren historiaren eta San Mames Barriaren lanen inguruko hainbat bideo ikusi daitezke. Era berean, Realak Liga Txapelketan lortutako laugarren postuaren, jokalarien ospakizunen eta txuri-urdinek egindako denboraldi bikainaren inguruko bideoak ere ikusi daitezke. Eduki horiek guztiek 80.000 ikustaldi baino gehiago izan dituzte eta 52.000 erabiltzaile bakar.