'Donostiako Aste Nagusia 2015' saio berezia, gauero

Donostiako su artifizialen inguruko zuzeneko saioa izango da ikusgai ETB1en eta eitb.eus-en, jaiak hasi eta datorren abuztuaren 15era bitartean. Agustin Ezenarrok eta Izaro Iraetak aurkeztutako saioan, gauero, Donostian Kontxako pasealekuan dagoen gau giro zoragarria zuzenean emateaz gain, erreportajeak, festaren protagonistak eta gonbidatu bereziak izango dituzte.

Lehen saioan, Iñaki Artola pilotaria, Maitane Segurola modelo eta blogaria eta Naiara Arnedo 'Goenkale'ko aktoreak izango dira gonbidatu.

Unai Etxabek jaien hasierako kanoikadaren erreportaje dibertigarri bat ekarriko digu, eta gainera, gonbidatuak ere izango ditu zuzenean: Tomas Ugaldeburu, kanoikadan egongo den dantzarietako bat; Uxue Santiago, Donostiako Piratak taldeko kidea, eta Eneko Egimendia, ETBko 'Gu Ta Gutarrak' saioko lehiakidea.

Su artifizialen nazioarteko 52. txapelketa Valentziako Valenciana su-etxeak hasiko du.