Hezkuntzari buruzko '200 en Jake' eztabaida saioan parte hartu nahi?

Ostiralean, apirilak 22, 'EiTB Focus' inkesta hezkuntzari buruzko emaitzak emango dira jakitera gauean, eta horren harira, '200 En Jake' saio berezia izango da ikusgai. 200 lagunekin eztabaida gidatuko du Xabier Lapitzek 22:30ean. Bertan, 200 herritarrek iritzia emateko aukera izango dute. Hezkuntzarekin zerikusia duten estamentuetako ordezkariak izango dira saioan: gurasoak, ikasleak, irakasleak, adituak... Guztiek 'EiTB Focus'ek emandako emaitzen inguruko hausnarketa egingo dute, hezkuntzaz eta politikaren inguruan.

Halaber, eitb.eus webgunean, 'EiTB Focus' orrialde berezian, egiten diren ikerketa guztien emaitzak eskura izango dituzte erabiltzaileek, behar beste eta lasaitasunez kontsultatu ahal izateko. Era berean, EiTBko programa ezberdinetan egiten diren analisiak ere bertan jarraitu ahal izango dira.

Eztabaidan nola parte hartu

Irakaslea, ikaslea edota ikasleen guraso elkarteko kidea bazara, eta ikusle gisara zein zure iritzia ematera joan nahi baduzu saiora, gonbidatuta zaude 200 hiritarrek hitza hartuko duten debate honetara.

Hortaz, '200 en Jake' EiTBren Bilboko egoitzan grabatuko den saioan parte hartuko dutenetako bat izan nahi baduzu, bidali zure datu pertsonalak eta telefono zenbakia helbide elektroniko honetara: 200enjake@eitb.eus. Ondoren, saioko arduradunak jarriko dira zurekin harremanetan.