Baionako besten irekiera, gaur, zuzenean, ETB1en eta eitb.eus-en

Gaur gauean, ETB1ek eta eitb.eus-ek Baionako besten irekiera ekitaldia eskainiko dute zuzenean, 21:30etik aurrera. Maitena Salinasek aurkeztuko du emanaldia Baionako Herriko Etxeko balkoitik zuzenean, Pantxika Maitia eta Andde Irosbehere kazetariek lagunduta.

22:00etan azalduko da Baionako bestetako protagonista eta ikurra, Leon erregea, herriko etxeko balkoian, eta, ondoren, Baionako hiru auzoak ordezkatzen dituzten hiru giltza botako dituzte balkoitik, bestei ofizialki hasiera emanez.

Horrez gain, Jaione Carpintero kazetariak Askatasunaren plazatik zuzeneko konexioak egingo ditu eta asteazkenean bertan ospatzen den munduko piper tortilla txapelketa ospetsuaren erreportaje berezia ekarriko du.