albistea
Africa Baetak aurkeztuta
Patxi Lopez izango du protagonista 'Euskadi Pregunta a' saioak
A.E.
EITB
Lau lehendakarigai nagusiei 30 herritarrek egindako galderekin osatutako saio sortak aurrera jarraitzen du, eta, asteazken honetan, PSE-EEren hautagaia galdekatuko dute. 22:15ean hasiko da.
-
Patxi Lopez. Argazkia: EITB
'Euskadi Pregunta a Patxi Lopez' saioa eskainiko du ETB-2k, 22:15ean. Lau lehendakarigai nagusiei zuzenduta 30 herritarrek egindako galderekin osatutako lau saioko sortako hirugarrena izango da. Oraingoan, PSE-EEren hautagaia galdekatuko dute, Africa Baetak gidatuta.
Aurreko saioak bezala, 22:15ean hasiko da. 90 minutu inguruko iraupena izango du aste honetakoak eta ETBren Miramongo estudioetan bilduko dituzte 30 pertsona, hautagaiari galdera egin diezaioten. Bildarte enpresak EAEko gizartera bideratutako irizpide estatistikoen arabera hautatutako herritar-multzo anitza izango da.
Pertsona bakoitzak hiru galdera pentsatu beharko ditu, baina bakarra egin ahal izango dio Basagoitiri. Bost arlo hauetakoak izango dira galderak: lehena, politika; bigarrena, ekonomia; hirugarrena, hezkuntza, osasungintza eta kultura; laugarrena, ingurumena, garraioa, zientzia eta gizarte politika; eta, bosgarrena, gai librea.
Laugarren saioa, ostegunean izango da, urriaren 4an, eta Iñigo Urkullu EAJren hautagaia izango da gonbidatu.
Jarraian, kazetarien eztabaida
Herritarrek lehendakarigaiari egindako galderen ostean, bigarren zatia eskainiko dugu, 75 minutukoa. Bilboko egoitzako plato batean, hainbat kazetarik elkarrizketa aztertuko du, Aitzol Zubizarretak gidatuta.
Euskadin argitaratzen diren zazpi egunkaritako ordezkariak bilduko dira saio honetara: Iñaki Soto (Gara), Juan Mª Gastaca (El País), Lourdes Perez (Diario Vasco), Josean Izarra (El Mundo), Alberto Ayala (El Correo), Pello Urzelai (Berria) eta Bingen Zupiria (Deia).
'Euskadi pregunta a Patxi Lopez: el debate' saioa 23:55ean hasiko da, eta aurreko saioan PSE-EEren hautagaiak emandako erantzunei buruzko hausnarketa egingo du.
'Euskadi Pregunta a', eitb.com-en
'Euskadi Pregunta a' saioak eitb.com-en webgune berezia dauka, eta bertan daude azalduta saioa ikustera etortzeko eginbeharreko urratsak. Elkarrizketak emango dituen bideoei eta albiste nagusiei jarraipena egingo die atari berezi horrek, eta, gainera, streaming bidez ikusi ahal izango da saioa, 22:15ean hasita.
