"Joko zikina erabili behar bada, erabiliko dut. Beti arauen barruan, baina muga mugan."

Oso kirolaria da gazte zumarragarra. Saskibaloian aritzen da eta gimnasiora joatea ere oso gustuko du. Horrez gainera, oso oso lehiakorra da.

Hori dela eta, Ainhize, bere neska-laguna, ere "Baserria"ko lehiakide izateak asko motibatzen du. "Talde ezberdinetan egonda, joko handia emango genuke" dio Iñigok.

Izan ere, edozein jarduera da egokia bikote honentzat lehian hasteko: gimnasiora, saskibaloiko tiroak botatzera, edo bolatokira joaten direnean, adibidez. "Normalean otorduak jokatzen ditugu eta ez zaigu galtzea gustatzen".

Bestetik, oso pertsona irribarretsua eta irekia da Iñigo. Lagun talde ugari ditu eta erraztasuna dauka jendearekin harremanetan hasteko.

Eztabaidak sortzen direnean, aldiz, bere jarrera entzutekoa izaten da lehendabizi. Hala ere, egoeraren arabera, aztoratu daitekeela dio. Beti iritzia ematearen aldekoa da; batzuetan, momentuan eta jende aurrean eta, beste batzuetan, beranduago eta pribatuan.