Estropadak
Estropadak
Donostiako Bandera, zuzenean EITBn
EITB Media
EITBk ahalegin berezia egingo du estropada bertatik bertara eta zehaztasun osoz eskaintzeko telebista, irrati zein Internet bidez.
Igande honetan jokatuko da Donostiako Banderaren bigarren jardunaldia, arraunaren urteko hitzordu nagusia, eta bertan izango dira EITB Taldeko hedabideak estropadaren ikusgarritasun eta zirrara telebista, irrati zein Internet bidez zabaltzeko.
ETB1eko eta eitb.eus-eko emanaldia 10:45ean hasiko da, eta arraunaz gozatzeko aukera izango da eta "Gaur Egun" albistegia hasi bitartean. Mikel Olazabalek eta Ibon Gaztañazpik egingo dute probaren kontakizuna, Eritz Hernandezek itsasotik eta Xabier Anduezak portuko arranpatik lagunduta. 13:15etik aurrera, gertatutakoaren inguruko mahaingurua gidatuko du Jon Balenziagak udaletxe aurrean kokatutako set berezitik. Bertan, Irati Larrañaga eta Ibon Gaztañazpi egongo dira analisia egiten.
Euskadi Irratiak eta Radio Euskadik ere ahalegin berezia egingo dute estropadaren xehetasun guztiak, ertz guztietatik, uhinen bidez zabaltzeko. Manu Maritxalarrek egingo du Euskadi Irratiko kontakizuna, Kepa Iribarrek gidatutako "Hiru Erregeen Mahaia" saioan. Bi arraun aditu izango dituzte lagun: Itziar Olasagasti eta Patxi Egurrola. Bestalde, Maitane Urbietak eta Haritz Gallastegik egingo dute probaren kontakizuna itsasotik eta portutik.
Radio Euskadin, Asier Kareaga, Imanol Cascante eta Ane Pescador arituko dira kontakizunean Alderdi Ederreko gunetik; Jon Hernández egongo da uretan, Txema Oliden portuko arranpan eta Jon Zubieta, berriz, delegatuekin.
Aurpegi eta ahots hauen guztien atzean profesional talde zabala egongo da telebista, irrati zein Internet bidez emanaldia lau haizeetara zabaltzeko, eta baliabide tekniko aurreratuenak erabiliko ditu EITBk.
