Go!azen
Gaztea eta Go!azen
'WTF Missy Elliot' bideoak jaso du Gaztea Dantzan-eko 'Go!azen Saria'
A.A. | eitb.eus
500 euroko saria jaso du Bilboko Fenomeno dantza-eskolak. Aritz Mendiola aktoreak (Gari) eman du irabazlearen berri 'Dida' saioan.
Bilboko Fenomeno dantza-eskolako taldeak irabazi du Gaztea Dantzan lehiaketaren 'Go!azen Saria'. Epaimahaiak ebatzi duenez, talde horrek bidalitako 'WTF Missy Elliot' izeneko bideoa izan da onena, eta, hori dela eta, hari eman diote 500 euroko saria.
'Go!azen' telesailak sari bat eman du Gaztea irratiak antolatutako ekimen honen barruan. Epaimahaian, Aritz Mendiola (Gari) egon da, eta 'Dida!' saioan jakinarazi du berak sari honen irabazlea nor den.
Hori, baina, ez da Gaztea Dantzan ekimeneko sari bakarra izan. Internet bidez boto gehien lortu dituen taldeak Entzulearen Saria jaso du; Sodupera joan da 1.000 euroko saria. Bigarrenak 500 euro jaso ditu, eta hirugarrenak, 300 euro. Horrez gain, epaimahaiak hiru sari eman ditu: talde onenaren saria (1.000 euroko saria Bilbora joan da); bikote edo bakarlari onenaren saria (500 euroko saria) eta Fenomeno dantza-eskolak irabazi duen 'Go!azen Saria'.
Sari guztiei buruzko informazioa Gaztearen webgunean egongo da.
