'Goenkale'-k arrakastatsu amaitu du denboraldia

'Goenkale' telesailak arrakastatsu amaitu du bere 19. denboraldia. Atzo emititutako azken atalak mugimendu dexente sortu zuen interneten, sare sozialetan. umap.eu atariaren arabera, ETB1eko telesailarekin lotutako bi traola joera izan dira azken 24 ordu hauetan: #Goenkale19AzkenAtala eta #Goenkale.

Umap.eu-k twitterlari euskaldunen jarduna jaso eta filtratzen du eta Twitterren euskaraz aritzen direnen artean, zer izan den joera kalkulatzen du. Zerbitzu honen arabera, Goenkaleko bi traolak azken 24 orduko joeren lehendabiziko bosten artean daude #Troquenor, #m4fborrokan eta #MemoriaHistorikoa terminoekin batera.

Horrela bada, #Goenkale traolarekin 204 mezu bota ziren atzo eta beste 192 #Goenkale19AzkenAtala jarrita.

Orokorrean, eta Twitterren irakurritakoaren arabera, jarraitzaileak 20. denboraldia ikusteko gogoz gelditu dira. @madditxu_7 izeneko erabiltzaileak, adibidez, honeko mezua utzi zuen: "Buaaaaa hurreeno tenporada nahideet bñ YAAAA!!! #Goenkale". @murua_maria, bestalde, intrigatuta gelditu zen: "eee au ezta normalaa! joe nei ez utzi olako intrigakin udara guztin :(( #goenkale".

Inesen bahiketaren amaiera izan da gehien komentatu duten gaietako bat. ¿@jongarate1-k susmo bat izan zuen: "Ojoo aer inesek parton hasi ber dun baso erdin!! jojojo #goenkale". Miren Gaztañaga aktorearen papera azken atal hauetan oso ona izaten ari da eta batek baino gehiagok aipatu zuen beldurra ere ematen duela.

Bestalde, Leonor Kubara joan a Nelsonekin. Pertsonaia beteranoenetakoa da Ainhoa Aierbek egiten duena eta jarraitzaileen gustukoenetako bat ere bai. @jokinariz-ek betirako ote doan galdetzen zuen eta @irati_elizalde-ren hitzetan, aldiz, "Uffffaaaa Leon despedidarako jarriduen kantakin bai emozionatu naizelaaaaa, aspaldiko garaiaak #goenkale"

Irailean Europako telesailik zaharrenetakoa denaren 20. denboraldiari ekingo diogu. Bitartean, 'Goenkale'ren 19.a osorik ikusi daiteke EiTB Nahieran atarian.