Ur Handitan
22:15ean
Pandemiak gazteei nola eragin dien aztergai, gaur gauean, "Ur Handitan" saioan
EITB Media
Arauak ez errespetatzea leporatuta, maiz hitz egin da gazteei buruz baina inoiz gutxi entzun dugu esateko dutena. Gazteen ahotik saioak gazteen ahotsak bilduko ditu.
Informazio gehiago (2)
Guztion bizitzak aldatu ditu urtebetez koronabirusak. Gazteei, ordea, ez zaie bizitza aldatu soilik: munduan euren lekua topatzen ari diren adin-tartean daudela, lehen esperiantzia asko ukatu dizkie pandemiak: herrietako jaiak, gau-giroa, lehen harreman afektibo-sexualak, ikasturte amaierako bidaiak, lagun-arteko kirola eta hamaika txokotako jendea ezagutzea. Arauak ez errespetatzea leporatuta, maiz hitz egin da gazteei buruz, baina inoiz gutxi entzun dugu esateko dutena. Salbuespen egoerak nola eragin dien galdetuko diete gaurko "Ur Handitan" saioak eskainiko duen Gazteen ahotik erreportajean.
Krisi garai guztietan bezala, pandemia garaian ere, errudunak bilatu ditu gizarteak eta, testuinguru horretan, gazteak ohiko susmagarriak dira: arduragabeak, berekoiak, kutsatzaileak… Festarik festa ibili direla eta segurtasun distantziak mantentzen ez dituztela leporatu zaie behin eta berriz.
Pandemiaren larritasunaz ez jabetzea egotzi zaie gazteei eta, bitartean, gurasoen etxean daude, kasik irten ezinik, zaila dute euren artean harremanak izatea eta, urtebetez, egoera horren amaiera noiz helduko den sumatu ere ez dute egin. Arauak ezartzean, gazteen egoera, baliabideak eta beharrak kontuan hartu ez direla uste dute gehienek.
Gazteen beharrak txikikeria izan daitezke ZIUan dauden gaixoekin alderatuta, baina, nola ari zaizkio aurre egiten orain arte ezezaguna zen egoerari? Zer nolako etorkizuna aurreikusten dute epe labur eta ertainean? 'Gazteen Ahotik' saioan, gazteek eurek kontatuko digute nola bizi izan duten azken urtea eta zer iruditzen zaizkien euren gaineko aurreiritzi horiek guztiak.
16 eta 25 urte arteko gazteak izango dituzte protagonista: Gaizka Suarez, Maialen Gago eta Diego Langa, Bilboko elkartasun sareetan boluntario aritu direnak; Ainhoa Tabuyo, Sua Enparantza eta Maddi Asenjo, Easo abesbatzeko kideak; Maider Herrero, Malen Ubiria eta Lucia Royo, Donostiako Zubiri Manteo institutuko batxilergoko ikasleak; Leire Lakasta, Izaro Telletxea eta Oiher Urrutia, EHUko ikasleak Gasteizko campusean; Sugoi Etxarri, 23 urteko psikologoa; Gorka Basterretxea, ostalaria eta Solange R. S. Bouyane Diatta, ikaslea.
"Ur Handitan" asteartero izaten da ikusgai, 22:15ean, ETB1en eta eitb.eus-en.
