Urdaibai, Hondarribia eta Orio, faborito Kontxako lehen asaltoan

Urdaibai, Hondarribi eta Orio dira Kontxako lehen jardunaldian denborarik onenak egiteko faborito nagusiak. Uda osoan ikusitakoaren arabera, denboraldiko trainerurik indartsuenak dira, inolako zalantza barik.

Urdaibaik bost aldiz irabazi du Kontxako Bandera azken zazpi urteetan, eta osteguneko sailkatze-estropadan ere onena izan zen. Espainiako txapelketa ere irabazi dute eta lider dira Eusko Label Ligan.

Aurreikuspen guztien arabera, Hondarribia Ligako bigarren sailkatua izango da bermeotarren aurkari nagusia, Oriorekin batera. Horiak indartsu ibiltzen dira beti Donostiako badian, eta beraiek dira, hain zuzen, historia osoan Kontxan garaipenik gehien lortu dituztenak (31). Ligan lau bandera irabazi dituzte orain arte.

Donostiako zaleek arreta bereziarekin jarraituko dute aurten estropada, Donostiarra etxeko trainerua sasoi betean dagoelako: lider dira KAE-1 Ligan, eta ohorezko txandan sartu nahi dute onenekin lehiatzeko. San Juan ere lehian izango da.

Kaiku eta Zierbena

Kaikuk ere helburu bera du, eta Donostiarrak baino aukera gehiago dituela ematen du, Zierbenarekin eta San Juanekin batera.

Tiran da lehian izango den zortzigarren trainerua. Kontxako Banderako historian sartzeaz gain, 24.000 euroko saria dago jokoan.

Eguraldiak ere zeresana izango du, euria, olatuak eta beroa espero dira.