Bennet Cantu-Bilbao Basket (78-69): Bigarren porrota Europan

Erredakzioa

Azken eguneratzea: 2011/11/04 10:30 (UTC+1)

Bizkaiak ez du partida ona jokatu Italian eta Euroligan hirutik bi partida galdu ditu. Etxetik kanpora irabazi gabe jarraitzen du talde bizkaitarrak.

Bizkaia Bilbao Basketek 78-69 galdu du Italian Canturen aurka. Argazkia: EFE

Whatsapp
Whatsapp
telegram
twitt
Bidali
Esteka kopiatu

Albisteak (1)

Katsikaris: 'Horrela defendatuta ez dago Euroligan irabazterik'

Bizkaia Bilbao Basketek Euroligako bigarren porrota jaso zuen Italian Bennet Cantu taldearen aurka 78-69ko emaitzarekin galduta. Etxetik kanpora garaipenik lortu gabe jarraitzen dute bizkaitarrek.

Partida hasieran berdintasuna izan zen nagusi. Bi taldeetako batek ere ez zuen alde handiegirik lortzen markagailuan. Dena den, italiarrak zertxobait hobeto aritu ziren eta hiru puntuko aldearekin iritsi ziren lehen laurdenaren bukaerara (18-15).

Bigarren laurdenean Bizkaiaren jokoak txarrera egin zuen. Kosta egiten zitzaien saski aurrean asmatzea eta Cantuk ez zuen egoera alferrik galdu. Laurden honetako lehen minutuetan ez zen gaizki ibili Bilbao basket, baina azken minutuetan kaskar aritu ziren. Partida etxeko taldearen aldeko 42-31eko emaitzarekin iritsi zen atsedenaldira.

Hirugarren laurdenaren hasiera ikusita bazirudien atsedenaldiak mesede galanta egin ziola Bizkaia Bilbao Basketi. Aldeak bost puntutaraino murriztu zituzten Katsikarisen mutilek, baina talde bizkaitarren erreakzioak laurdenaren erdialderaino bakarrik iraun zuen. Ordutik aurrera, Cantuk hasierako minutuetan pasatako momentu txarrak ahaztu eta berriro joko ona egin zuen. Honen ondorioz, italiarrek hamar puntuko aldea lortu zuten hirugarren laurdenaren amaieran (60-50).

Bilbao Basketek azken laurdenean bere bertsio onena eskaini eta markagailuari buelta emango zionaren esperantzarik geratzen zen oraindik, baina esperantza soilik izan zen. Cantuk ondo administratu zuen aurreko laurdenetan egindako lanarekin lortutako aldea eta gehiegi sufritu gabe garaipena lortu zuten italiarrek (78-69).

Fitxa teknikoa:

78 - Bennet Cantu (18+24+18+18): Markoishvili (12), Cinciarini (10), Leunen (14), Micov (9) eta Shermadini (16) –hasierako bostekoa- Mazzarino (5), Basile (6) Scekic (6) eta Ortner (-).

69 - Bizkaia Bilbao Basket (15+16+19+19): Jackson (0), Grimau (4), Mumbru (20), Banic (19) y D'or Fischer (10) –hasierako bostekoa-; Raul Lopez (-), Blums (9), Vasileiadis (-), Hervelle (5), Mavroeidis (2) eta Josh Fisher (-).